سلێمانی.. لە 28 رۆژدا 18163 منداڵ براونەتە نەخۆشخانە

964+
پێشەوا محەمەد – سلێمانی

لەماوەی 28 رۆژدا سەرووی 18 هەزار منداڵ براونەتە نەخۆشخانەی منداڵانی سلێمانی کە 357ـیان ناکام و بەدخۆراک بوونە.

بەپێی ئامارەکانی بەڕێوەبەرایەتی گشتی تەندروستی سلێمانی بێت، لە مانگی شوباتی رابردوو 18163 منداڵ لە سلێمانی سەردانی نەخۆشخانەیان کردووە.

لەم ژمارەیەدا 357 منداڵیان ناکام و بەدخۆراک بوونە بەهۆی ئەمەشەوە لە نەخۆشخانە هێڵدراونەوە.

لە ئامارەکەدا تەندروستی سلێمانی دەڵێت: هەر لەو مانگەدا 256 منداڵ لەبەشی تیشك و دەمار و 120 منداڵیش لەبەشی راهێنانەوەی چارەسەری خۆراك بینراون، هەروەها هەزار و 72 حاڵەتی هەناسەتووندی و 26 حاڵەتی گیانلەدەستدانی منداڵ تۆمار كراوە.

سەرجەمی ئەو منداڵە نەخۆشخانە لە نەخۆشخانەی د.جەمال ئەحمەد رەشیدی تایبەت بە منداڵ بیندراون.

بە پێی ئامارەکەی بەڕێوەبەرایەتی تەندروستی سلێمانی بێت، 16 هەزار و 362 پشكنینی تاقیگەیی جۆراوجۆر و 122 پشكنینی گەشەی هۆرمۆن و 421 سۆنەر و 154 ئیكۆ و 17 نازوور ئەنجام دراوە و 843 تیشك گیراوە.