" خۆشمدەوێیت پیاز خۆرەکەم"
پیاوێک چەپکەپیازی بۆ هاوسەرەکەی کردە دیاری
964+
عەبدولعەزیز خالند- هەولێر
ئیدی دنیایە و هەموو شتێکی تێدایە، چەپکەپیازیش لەبری چەپکەگوڵ لە پیاوێکەوە بۆ هاوژینەکەی کرایە دیاری و لەسەریشی نوسی، خۆشمدەوێیت پیاز خۆرەکەم.
بڵاوکردنەوەی ڤیدیۆیەک لەلایەن گوڵفرۆشێکی هەولێرەوە کاردانەوەی لێکەوتەوە، دەردەکەوێت چەپکێک پیازیان رازاندووەتەوە هاوشێوەی چەپکە گوڵەکان، پەیامنێری 964 خۆی گەیاندە لای گوڵفرۆشەکە و پێی وتین، ئەمە عەلاگەیەک پیاز بوو، لەلایەن پیاوێکەوە بۆمان هێنرا و وتی، بۆمبەکەنە چەپکێک دەیکەمە دیاری بۆ هاوسەرەکەم حەزی لە پیازە.
وادیارە سەردەمەکەی گۆڕاوە و ئێستا هەر گوڵ ئامرازی رۆمانسیەت و خۆشەویستی نییە، وەک گوڵفرۆشەکە باسی دەکات، ئێستا فراولە و لالەنگی و کاهووش دەهێنن بیکەینە چەپکەگوڵ.
پێداچوونەوە: پەری ساڵح
