باڵەخانەی ژووری بازرگانی و پیشەسازی هەولێر _ وێنە: 964
چوون و هاتنەوە و مانەوەش بەلاشە
بازرگانانی هەولێر دەتوانن بەشداریی پێشانگەی مۆدە و جلوبەرگ بكەن لە توركیا
964+
ئەرسەلان عەبدوڵا
پێشانگەیەكی جلوبەرگ و مۆدە لە ئەنقەرەی پایتەختی توركیا دەكرێتەوە، بازرگانانی هەولێریش دەتوانن بەشداریی بكەن.
كامەران محەمەد ئەندامی ئەنجومەنی ژووری بازرگانی و پیشەسازیی هەولێر بە 964ی راگەیاند، چوارەمین پێشانگەی نێودەوڵەتیی بۆ جلوبەرگ و مۆدە لە شاری ئەنقەڕە دەكرێتەوە، كە لە ماوەی نێوان 11 تا 13.2.2026 بەڕێوەدەچێت.
وتیشی، “دەرفەت هەیە بۆ بازرگانان و خاوەنکارانی هەولێر، ئەوانەی ئەندامن لە ژوورەکەمان و لەو بوارانەی دیاریكراوە كاردەكەن، دەتوانن بەشداریی بكەن.
هەروەها ئەوەشی خستەڕوو، ئەوانەی خوازیارن بەشداربن لە پێشانگەكە، سەردانی ژووری بازرگانی و پیشەسازی هەولێر – بەشی پەیوەندییەکان بکەن، بۆ ئەوەی ئاسانكارییان بۆ بكرێت، بەڵام تا 15ی ئەم مانگە دەرفەت هەیە بۆ پێشكەشكردنی داواكاری.
كامەران محەمەد ئۆفەری ئەوەشی باسكرد، ئەوانەی بەشداریی دەكەن، چوون و گەڕانەوەیان بە فڕۆکە دەبێت، یەک شەو هۆتێل و گواستنەوەیان لە فڕۆکەخانە بۆ هۆتێل و پێشانگەکە، هەمووی لە ئەستۆی رێکخەری پێشانگاکە دەبێت و بەخۆڕاییە.
لە هەرێمی كوردستان و بە تایبەتی لە هەولێر، ژمارەیەكی زۆر بازرگان و خاوەنكار لە بواری جلوبەرگ و مۆدە و كۆزمەتیك كار دەكەن و كەلوپەلی توركیاش بەشێكی سەرەكیی بازاڕی كوردستان و عێراق پێكدەهێنێت.
