لەلایەن زانکۆی سۆرانەوە
1000 کتێب کرایە دیاری بۆ کتێبخانەی چەمچەماڵ
964+
ژێوار خدر
وەک هاوخەمییەک بۆ زیانەکانی کتێبخانەی گشتیی چەمچەماڵ، زانکۆی سۆران 1000 ناونیشانی جیاوازی کتێبی پێشکەش بە کتێبخانەکە کرد، ئەم هەنگاوە دوای ئەوە دێت، کە بەهۆی شەپۆلی بەهێزی بارانبارین و لافاوەکەی رۆژی 9/12/2025، کتێبخانەی گشتیی چەمچەماڵ زیانێکی گەورەی بەرکەوت، بەجۆرێک هەزاران ناونیشان و کتێبی جیاواز لەناوچوون و بوونە بەشێک لە پاشماوەی لافاوەکە.
زانکۆی سۆران رایگەیەناد، ئەم کتێبانە لە رێگەی کتێبخانەی ناوەندیی زانکۆ و هەڵمەتێکی فراوانی کۆکردنەوەی کتێب لەلایەن ستافی زانکۆکەوە دابینکراون، مەبەست لەم دەسپێشخەرییە، بەشدارییکردنە لە ئاوەدانکردنەوەی کتێبخانەی گشتیی چەمچەماڵ و پڕکردنەوەی ئەو بۆشاییە کتێبانەی کە بەهۆی رووداوەکەوە لەناوچووبوون.
ئاماژەی بەوەش کردووە، کە ئەمەیان وەک ئەرکێکی زانستی و نیشتمانی ئەنجامدراوە بۆ پاڵپشتی لە خوێنەران و گەنجانی چەمچەماڵ، تاوەکو جارێکی دیکە ژێرخانی رۆشنبیریی شارەکە ببوژێتەوە و ئەو زیانە گەورەیەی بەر کتێبخانەکەیان کەوتووە، قەرەبوو بکرێتەوە.
