چەند گەنجێکی زانکۆی کوردستان دروستیان کردووە
رۆبۆتێکی کوردی شوێنی وەستا و کرێکار دەگرێتەوە
964+
رێباز خدر – هەولێر
چەند گەنجێکی شاری هەولێر، هەڵساون بە دروستکردنی رۆبۆتێک کە لە داهاتوو دا دەتوانێت لە بری وەستا و کرێکار کار بکات لە بیناسازیدا.
عومەر مەحمود، خوێندکاری قۆناغی یەکی ئەندازیاری شارستانییە لە زانکۆی کوردستان بە 964ـی وت، ئەم رۆبۆتە تایبەتە بە کاری بیناسازی کە توانای هەڵگرتنی بلۆک و چیمەنتۆی هەیە لە یەک کاتدا، دەتوانێت بلۆک و چیمەنتۆکە بەیەکەوە دابنێت پێویستی بە وەستا و کرێکار نابێت.
وتیشی، ئەم رۆبۆتە کارێکی تریش دەکات کە پاشماوەی بلۆکەکان هەڵدەگرێتەوە و لە شوێنێک دایاندەنێت، کە لە رێگەی ئەپڵیکەیشنێکی مۆبایلەوە شوێنەکەی بۆ دیاری دەکرێت.
رۆبۆتە کوردییەکە، لە 35 پارچە و چوار مۆتۆڕ و حەوزێکی چیمەنتۆ پێکهاتوە، هەروەها لە رێگەی دەنووکێکەوە بلۆکەکان و لە رێگەی بۆرییەکەوە چیمەنتۆکە هەڵدەگرێت، تێچووی ئەم رۆبۆتە تەنیا سەد هەزار دینارە.
پێداچوونەوە: توانا نەقی
