وتەبێژی کۆشکی کۆماری میسر؛
سەرۆكی میسر لە کۆبونەوەی لەگەڵ سەرۆکی حکومەتی هەرێم “پشتیوانی یەکپارچەیی عێراقی دەکەین”
964+
فەرهاد حەسەن
سەرۆک کۆماری میسر لە میانەی كۆبونەوەیەكدا لەگەڵ مەسرور بازرانی سەرۆكی حكومەتی هەرێم، ستایشی هەوڵەکانی عێراق و دەسەڵاتدارانی هەرێمی کوردستانی کردووە کە ئامانجیان چەسپاندنی سەقامگیری و ئاشتییە لە ناوچەکەدا و پشتیوانی تەواوی خۆیشی بۆ یەکپارچەیی عێراق و سەلامەتی خاکەکەی، دووپاتکردووەتەوە.
محەمەد ئەلشناوی، وتەبێژی فەرمی سەرۆکایەتی کۆماری میسر لە راگەیەندراوێكدا کە ماڵپەری سەرۆکایەتی کۆمار بڵاویکردووەتەوە، رایگەیاند، سەرۆک عەبدولفەتاح سیسی لە کۆبونەوەکەدا جەختی لە “پشتیوانی تەواو و بەردەوامی میسر بۆ عێراق، و بۆ یەکپارچەیی و سەلامەتی خاکەکەی، و پشتیوانیکردنی لە رووبەڕوبونەوەی ئەو ئالەنگارییە زۆرانەی ناوچەکە پێیدا تێپەڕ دەبێت، بەتایبەتی تیرۆر” کردەوە.
بەپێی راگەیاندراوەکە، لە گفتوگۆکاندا باسیان لە پەیوەندییەکانی هاوکاری ئابوری نێوان میسر و عێراق کردوە، بە هەرێمی کوردستانیشەوە. سیسی جەختی لە “پەرۆشی میسر بۆ قوڵکردنەوەی هاوکاری ئابوری بە هەموو شێوەکانییەوە لە نێوان هەردوولادا کردەوە و لەم چوارچێوەیەدا ئاماژەی بە توانا گەورەکانی کۆمپانیا میسرییەکان کرد، بەتایبەتی لە بوارەکانی وزە و ژێرخان و ئەو ئەزمونانەی کە لە ناوەوە و دەرەوەی میسر هەیانە.
سیسی داوای لە حکومەتی هەرێمی کوردستان کردووە سود لە توانای ئەو کۆمپانیایانە وەربگرێت بۆ جێبەجێکردنی پڕۆژەکان بە کوالێتی بەرز و تێچوی کێبڕکێکارانە، لەبەرامبەریشدا مەسرور بارزانی پێشوازی لە رۆڵی کۆمپانیا میسرییەکان لە عێراق کردووە و جەختی کردەوە کە لە کاتی سەردانەکەیدا چاوەڕوانە لەگەڵ لایەنە پەیوەندیدارەکانی میسر کار بکات بۆ تاوتوێکردنی ڕێگەکانی بەهێزکردنی هاوکاری و سوود وەرگرتن لە ئەزمونەکانی میسر لە ژمارەیەک کەرتی لە پێشینە بۆ حکومەتی هەرێمی کوردستان.
بارزانی، پێزانینی حکومەتی هەرێمی بۆ رۆڵی میسر و سەرۆک سیسی لە “پشتیوانیکردنی عێراق و گێڕانەوەی ئاشتی و سەقامگیری بۆ ناوچەکە” دەربڕیوە و و جەختیشی کردووەتەوە کە “حکومەتی هەرێمی کوردستان چاوەڕوانە بەردەوام بێت لە بەهێزکردنی پەیوەندییەکانی هاوکاری لەگەڵ دامەزراوەکانی میسردا”.
ئێوارەی دوێنێ شهممه مەسرور بارزانی بە سەردانێکی فەرمی، گەیشتە قاهیرەی پایتەختی میسر و لەلایەن ئەحمەد فوئاد هنو، وەزیری رۆشنبیریی و ژمارەیەک لە بەرپرسانی دیکەی میسری پێشوازی لێکرا، ئەمڕۆش لە كۆبونەوەیەكدا لەگەڵ سەرۆكی ئەو وڵاتە جەخت لە گرنگیی بەهێزکردنی پەیوەندییەکانی هەرێمی کوردستان و میسر لە بوارە جۆراوجۆرەکاندا، بە تایبەتی وەبەرهێنان و ئاڵوگۆڕی بازرگانیدا کرایهوه.
سەرۆکی حکومەتی هەرێم گەیشتە وڵاتی میسر
