لە شەوى یەڵدا
مامۆستایەکى ئاینیى: جلى کوردى جێگەى رەزامەندى پێغەمبەرى خودایە
964+
سیروان خورشید- خورماتوو
ئەمشەو، خورماتوو شەوێکى جیاوازى بەڕێکرد و لە هۆڵى گەنجانى گەڕەکى رزگارى قەزاکە، گەنجان و پیاوان پێکەوە کۆبوونەوە و بەشدارى چالاکییەکانى شەوى یەڵدایان کرد.
جگە لە ئەنجامدانى چەندین چالاکى جۆراوجۆرى وەک یاری کوردەواریى و بەستەو گۆرانى، مامۆستایەکى ئاینیش لەرووى ئاینى و نەتەوەییەوە باسى شەوى یەڵداى کرد.
هاوار شافعى، وتارخوێن و مامۆستاى ئاینى بۆ 964 وتى،”خۆشحاڵم کە گەنجان بە جلى کوردییەوە بەشداریان کردووە، چونکە جلى کوردى جلێکى جوانە و جێگاى رەزامەندى پێغەمبەرى خودا (د.خ)یە”.
لەبارەى شەوى یەڵداوە، ئەو مامۆستا ئاینییە باسى لەوە کرد، شەوى یەڵدا کە شەوى درێژە بۆ عاریفان و خواناسان تایبەتمەندى خۆى هەچە، وەک دەڵێت،”شەوێکە بۆ ئەوەى خواناسان راز و نیازى خۆیان لەگەڵ خودا بگۆڕنەوە، بۆیە گرنگە ئەو شەوە بە دوعا و پاڕانەوە بەرێ بکەین”.
پێداچوونەوە: وریا فەتاح
