لۆگۆی وەزارەتی پێشمەرگە
راگەیاندراویان بڵاوكردەوە
وەزارەتی پێشمەرگە لیژنەی لێكۆڵینەوەی لە بارەی رفاندنی رۆژنامەنووسێک پێكهێنا
964+
ئەرسەلان عەبدوڵا
وەزارەتی پێشمەرگەی كوردستان رایگەیاند، لیژنەیەكی لێكۆڵینەوەیان پێكهێناوە سەبارەت بە رووداوی رفاندنی رۆژنامەنووسێك، كە كارمەندی وەزارەتەكەیە و پێشتر سكرتێری رۆژنامەوانی وەزیری پێشمەرگەش بووە.
راگەیەندراوەكەی وەزارەتی پێشمەرگە بەم جۆرەیە:
شەوی ١٩ لەسەر ٢٠ی ١٢ی ٢٠٢٥، میران بکر عبدالرحمان، کارمەندی وەزارەتی پێشمەرگە تووشی روداوێکی نەخوازراو بوو.
١: ئەو رووداوە نەخوازراوەی کەرووبەڕوی کارمەندێکی وەزارەت بۆتەوە.
دەستبەجێ وەزارەت لیژنەیەکی لێکۆڵینەوەی لەسەر رووداوەکە پێکهێانەوە بۆ بەدواداچون لەسەر ئەم دۆسیەیە.
٢: بۆئاگاداری ڕای گشتی میران بەکر کارمەندی وەزارەتمان ماوەی دووساڵە سکرتێری رۆژنامەوانی وەزیری پێشمەرگە نەماوە.
نوسینگەی ڕۆژنامەوانی وەزیری پێشمەرگە
٢٠ی کانوونی یەکەمی ٢٠٢٥
میران بەكر پێشتر سكرتێری رۆژنامەوانیی وەزیری پێشمەرگە بووە و لە سۆشیال میدیای خۆی رایگەیاندووە، شەوی رابردوو لەلایەن هێزێكەوە لە نزیك مەكتەبی سیاسیی یەكێتیی نیشتمانیی كوردستان لە هەولێر، رفاندوویانە و توورەگەی رەشیان لەسەركردووە و كەلوپەلەكانی ناو ئۆتۆمبێلەكەیان بردووە و هەروەها لێیان داوە، دواتر لە شوێنێك ئازادیان كردووە و پێیان وتووە هەڵەیان كردووە.
