پردە و باران ببارێ خەرق دەبێ
زیاتر لە 100 خوێندکار لە کۆیە بەڕێگایەکی مەترسیدار دەچنه قوتابخانە
964+
دەریا ئەحمەد – کۆیە
زیاتر لە 100 قوتابی، لە گەڕەکی بەفری قەندیلەوه بەرێگایەکدا دەچن بۆ قوتابخانەی هۆمەر قوچان لە گەڕەکی ئازادی، کە رێگاکە ئاوەڕۆی گەڕەکە و پردێکی بچووکی بەسەرەوەیە، لەهەر ئان و ساتێکدا باران بە خوڕ ببارێ پردەکە خەرق دەکات.
ئەمەش ترسی لای کەسوکاری خوێندکارەکان لە کاتی باران و لافاو زیاد کردووە، کەسوکارێکی خوێندکاریش دەڵێ، رێگاکە نەک تەنیا بۆ ئەو منداڵە بچووکانە، بەڵکو بۆ هاتوچۆی گەورەکانیش مەترسیدارە.
مەولود هاوار کەسوکاری خوێندکارە و بە 964ـی وت، ئەم رێگایە وەک رێگایەکی گشتی لێهاتووە و جگە لەوەی خوێندکارێکی زۆر رۆژانە هاتوچۆی پێدا دەکەن و تەمەنیان بچووکە، خەڵکی هەردوو گەڕەکیش بەکاری دەهێنن، لە کاتی باران و لافاو مەترسی جدی لەسەر گیانی خوێندکاران دروست دەکات و بەهیواین پێش ئەوەی کارەساتێک رووبدات چارەسەری ئەم رێگایە بکەن و ئاوەڕۆی سندوقی بۆ دروست بکەن.
لەسەر ئەم بابەتە ئەندازیار محەمەد میرحاج سەرۆکی شارەوانی کۆیە بە 964ـی وت، ئاوەڕۆی سندووقی بۆ ئەو شوێنە زۆر پێویستە و دەرخستە و داواکاریمان بۆ پڕدووەتەوە و ڕرەزامەندیەکەشی هاتووەتەوە، تەنیا ئەوە ماوە پارەمان بۆ خەرج بکرێت و دەست بە درووستکردنی بکەین.
لەم رێگایە قوتابیانی پۆلی یەک تا نۆی بنەڕەتی هاتوچۆ دەکەن و لە کاتی باران و لافاویش، لەبەر مەترسیداری رێگاکە کەسوکاریان خۆیان لەگەڵیان دەڕۆن و دەیانگەیەننە قوتابخانە، وەک کەسوکاری خوێندکاران خۆیان وتیان.
پێداچوونەوە: ئەحمەد مستەفا
