گۆڕستانى ئیمام حەسەن لە خورماتوو
بەهۆى بارانەوە؛ ژمارەیەکى زۆر گۆڕ بوون بەچاڵ
964+
سیراوان خورشید- خورماتوو
دوو رۆژە بارانبارین بەردەوامە، خەڵکى بەبارانى رەحمەت و ژیانەوەى سەرچاوەکانى ئاو ناوى دەبەن، بەڵام بارانەکە بۆ گۆڕستانى ئێمام حەسەن لە خورماتوو بوو بە زەحمەت، چونکە ئاو چووەتە ناو گۆڕەکان و چاڵ و چۆڵى تێدا دروستکردوون.
ژمارەیەکى زۆر لە گۆڕەکانى ئەو گۆڕەستانەى خورماتوو بەهۆى ئاوى بارانەوە رۆچوون، بەشێوەیەک ژمارەیەک لە گۆڕەکان بوون بە چاڵ.
هێمن نەجم کە سەرپەرشتیارى گۆڕستانەکەیە بۆ 964 قسەى کردووە و دەڵێت، ئەمە ساڵى یەکەم نییە، پاریش وابوو، هۆکارەکەش ئەوەیە خاکى گۆڕستانەکە فشەڵە و لەگەڵ هەر بارانێک رۆچوون روودەدات.
ئەو گلەیى لە کەسوکارى مردوان هەیە کە لە کاتى سپاردەکردنى گۆڕى کەسوکارەکانیان بە گوێیان ناکەن و بە ئارەزووى خۆیان لە جێگایەک دەینێژن، پێشى وایە هۆکارێکى تر هەڵبەستنى گۆڕەکانە بە کێل و چمەنتۆ کە رێڕەوى ئاوەکە دەگرن.
داواش لە کەسوکارى ئەوانە دەکات کە گۆڕى ئازیزانیان لەو گۆڕستانەیە، هەرکە بارانەکە خۆشیى کردەوە، بچن و گۆڕەکان خاس بکەنەوە.
پێداچوونەوە: وریا فەتاح
