موەلیدە ئەهلییەکان: کارەباچی و ئیشپێکەری مۆلیدەکانمان دابمەزرێنن

964+

ئەحمەد مستەفا

نوێنەرانی خاوەن مۆلیدەکانی گەڕەکەکانی هەولێر، ئەمڕۆ چوارشەممە 26.11.2025 لەبەردەم بەڕێوەبەرایەتی ئاوی شارەکە گردبوونەوە و داوایان کرد جگە لە قەرەبوو کردنەوە، کارەباچی و کارپێکەری موەلیدەکان دابمەزرێنرن.

ئەوانە داواکارییەکەیان رووە و حکومەتی هەرێمی کوردستان بوو.

بەهۆی پڕۆژەی رووناکی، مۆلیدە ئەهلییەکان لە سەنتەری سەرجەم پارێزگاکانی هەرێمی کوردستاندا کوژێندراونەتەوە کە بەپێی راگەیەندراوێکی پڕۆژەکە، سێ هەزار و 700  موەلیدە کوژێنراونەتەوە.

ئەوان لەیاداشتێکدا رایانگەیاند، ساڵانی رابردوو هاوکاری حکومەت بوون لەدابینکردنی کارەبا و لەپڕۆژەی رووناکیش رێنماییەکانیان تەواو جێبەجێ کردووە، بەڵام بەداخەوە زیانێکی زۆریان بەرکەتووە.

ئەو خاوەن مۆلیدانە داوا لەسەرۆکی حکومەتی هەرێمی کوردستان دەکەن، قەرەبووی زیانەکانیان بۆ بکاتەوە و لەهەمان کاتدا ئەو کەسانەی وەک کارەباچی و ئیشپێکەری مۆلیدەکان کاریان کردووە دابمەزرێن لەپڕۆژەی ڕووناکی، چونکە هەموویان دەرچووی زانکۆ و پەیمانگان.

وتیشیان،  ماوەی دوو ساڵە (2024 و 2025) بە بەردەوامی کارەبایان بۆ بیرەکانی بەڕێوەبەرایەتیی ئاوی هەولێر دابین کردووە، بەڵام تا ئێستا حکومەت شایستە داراییەکانی بۆ خەرج نەکردوون، سەرەڕای بەدواداچوون و سەردانەکانیان، پێیان راگەیەندراوە کە پارەکەیان کراوەتە چەکی بانکی و پارەی نەقد “کاش” نییە بۆیان خەرج بکرێت، بڕی پارەکەش لەنێوان 10 بۆ 50 ملیۆن دینارە.

لە بەحرکە موەلیدەیەک کارەساتی نایەوە؛ بارهەڵگرێک و چەند خانوویەکی سووتاند