لە شەممەی داهاتووەوە بارانی پەڵە دەبارێت 

964+

توانا نەقی

هەواڵی خۆش بۆ جوتیاران و خەڵکیش لەسەر بارانبارین ئەوەیە کە لە رۆژی شەممەی داهاتووەوە بارانی چاک سەرجەم ناوچەکانی کوردستان بە شار و ناوچە شاخاوییەکانەوە  بە بڕی جیاواز دەگرێتەوە .

سیروان ساڵح شارەزای کەشناسی بە 964ـی وت، بارانبارینەکە هەریەک لە  پارێزگای دهۆک، باکووری پارێزگای هەولێر، ئیدارەی سۆران، ناوچەکانی مێرگەسوور و سیدەکان و چۆمان و حاجی ئۆمەران، ناوچە شاخاویەکانی باکووری پارێزگای سلێمانی و ئیدارەی ڕاپەڕین دەگرێتەوە و 20 بۆ 50 ملم بارانیان لێ دەبارێت.

وتیشی، سەنتەری شارەکانیش لە نێوان 10 بۆ 20 ملم باران دەبارێت، بەڵام لە گەرمیان لە نێوان 5 بۆ 10 ملم دەبارێت و لە زۆربەی شوێنەکان پەڵە دەدات.

ئەو کەشناسە ئاماژەی بەوەشکرد، بە پێی پێشبینی ئەوان شەپۆلەکە لە رۆژی شەممەوە دەستپێدەکات و لە ئێوارەی رۆژی دووشەممە کۆتایی دێت و کەش ئاسایی دەبێتەوە.