تیمەكانی شارەوانی پۆستەری كاندیدەكانی هەڵبژاردن لێدەكەنەوە، فۆتۆ: پارێزگای هەولێر
ئەمشەو لە هەولێر
پۆستەر و وێنەی كاندید و ئاڵای حزب و لایەنە سیاسیەكان لادەبرێن
964+
ئەرسەلان عەبدوڵا
لە هەولێر هەڵمەتی لابردن و لێكردنەوەی پۆستەر و وێنەی كاندید و ئاڵای حزبەكان و لایەنە سیاسییەكان دەستیپێكرد و پارێزگار خۆی سەرپەرشتی دەكات.
ئەمشەو سێشەممە 11.11.2025، دوا بەدوای كۆتایهاتنی پڕۆسەی دەنگدانی گشتی، هەڵمەتەكە لە ژێر چاودێری پارێزگاری هەولێر ئومێد خۆشناو بۆ لابردنی پۆستەر و وێنەی كاندیدان و ئاڵای حزب و لایەنە سیاسیەكان دەستیپێكرد.
لە هەڵمەتەكەدا وەك لە راگەیاندنی پارێزگادا هاتووە، شارەوانی بە هەموو بەشەكانی و ژینگەپارێزی و خزمەتگوزاری بەشدارن و هەرچی لۆگۆ و پۆستەر و لافیتە و وێنەی كاندید و ئاڵای لایەنە سیاسییەكان لادەبەن و شەقام و گوزەرەكان پاكدەكەنەوە.
دوای مانگێك لە هەڵمەتی بانگەشەی هەڵبژاردن و دواتریش بەڕێوەچوونی هەڵبژاردنی گشتی، ئیتر پۆستەر و وێنەی كاندید و لۆگۆی لایەنە سیاسییەكان پێویست نییە و بەشێكی زۆری شەقام و رێگەبانەكانیان گرتووە، پێش دەستپێكردنی هەڵمەتەكەش بەشێكی زۆری پۆستەر و وێنەی كاندید و لایەنەكان لە لایەن بەشێكی هاوڵاتییانەوە لێكرانەوە و بردران بە مەبەستی سوودوەرگرتن لە شیش و ئاسنی پۆستەرەكان.
