گەشتیاران بۆ چەند کاتژمێرێک دەمێننەوە و گیریان خواردووە
هاتوچۆی کۆڵبەر جەنجاڵی زۆری لەناو مەرزی حاجی ئۆمەران دروست کردووە
964+
شۆڕش قادری
هاتوچۆی کۆڵبەر لە مەرزی نێودەوڵەتی حاجی ئۆمەران جەنجاڵی و قەرەباڵغی زۆری لەناو مەرزەکە دروست کردووە و زۆر جار گەشتیاران بۆ چەند کاتژمێرێک دەمێننەوە و ماتڵ و گیرۆدە دەبن.
چەند مانگێکە ئێران لە چوارچێوەی رێکخستنەوەی یاساکانی پەیوەندیدار بە مەرزەکان و کۆڵبەری کارتێکی بەناوی کارتی مەرزنشینانی بۆ خەڵکی سەرسنوور دەرکردووە، ئەوانەی ئەو کارتەیان هەیە، مانگانە، پارەیەکی کەم دەچێتە سەر حیسابەکانیان و هەروەها رۆژانەش دەتوانن بە فەرمی کۆڵێک لەناو مەرزەوە بێنن و ببەن، هەربۆیە رۆژانە بەسەدان کەس دەڕژێنەناو چەند مەرزێکی وەک حاجی ئۆمەران و کێلێ و جەنجاڵی و قەرەباڵغییەکی زۆر لە مەرزەکان دروست دەبێت.
خۆ ئەگەر هەندێک جار ئینتێرنێت نەمێنێ یان سیستەم دابخرێت کە ئەوەش زۆر جار لە دیوی رۆژهەڵاتی کوردستانەوە روودەدات، ئەوا کۆڵبەر و گەشتیارێکی زۆر سەریەک دەکەوێتەوە و تەواوی رۆژەکە ماتڵ دەبن.
سەبارەت بەو بابەتە قسەمان لەگەڵ مەسعود باتێلی بەڕێوەبەری مەرزی نێودەوڵەتی حاجی ئۆمەران کرد، ئەو وتی، “دوای کۆتاییهاتنی هەڵبژاردنی ئەنجومەنی نوێنەرانی عێراق، دیراسەیەکی باشی ئەو بابەتە دەکەین و هەوڵ دەدەین لاینی کۆڵبەران لە موسافر و گەشتیاریان جیا بکەینەوە و کێشەکە بەجۆرێک لە جۆرەکان چارەسەر دەکەین”.
