سێ رۆژ بەردەوام دەبێت
یەكەم رۆژی فێستیڤاڵی شانۆی شەقامی كەركوك بەڕێوەچوو
964+
کاروان ساڵحی کەرکوک
بە بەشداریی هونەرمەندانی 15 وڵات و بە ئامادەبوونی چەندین هونەرمەندی ناودار لە سەر ئاستی کوردستان و عێراق و دەرەوەی وڵات، چالاکییەکانی نۆیەمین فێستیڤاڵی نێودەوڵەتیی شانۆی شەقام لە كەركوك دەستیپێکرد و تێیدا چەند هونەرمەندێکیش خەڵاتی زێرینیان پێشكەش كرا.
هەوار فارس بەرپرسی راگەیاندنی فێستیڤاڵەکە بە 964ـی وت، 20 نمایشی شانۆیی پێشكەش دەكرێن، لەگەڵ کۆمەڵێک چالاکی دیکە، هەروەها ئەمڕۆ پێنج هونەرمەندی بواری شانۆ و سینەمای جیهانی خەڵاتی زێرینیان پێشكەش كرا، کە پێکدێن لە ئەکتەری بەناوبانگی ئیرانی جەعفەر دەهقان، نیگار حەسیب قەرەداغی، شوان عەتوف، ئەكتەری عێراقی ئەیاد رازی و فەرشید گەوێڵی.
وتیشی، گرووپی کیژانی سنە کۆنسێرتێکی گۆرانی و میوزیکیان پێشکەش كرد، فێستیڤاڵەکە سێ رۆژ دەخایەنێت و سبەی و دووسبەی نمایشەکان پێشەکش دەکرێن.
باسی ئەوەشی كرد، چەند کتێبێک بڵادەكرێنەوە لە بارەی هونەری شانۆی شەقام و توێژینەوەیەکیش لە سەر شانۆی شەقام پێشكەش دەكرێت و وۆركشۆپیش ئەنجام دەدرێت لەگەڵ چەند چالاكییەكی دیكەش.
پێداچوونەوە: ئەرسەلان عەبدوڵا
