دەستپێکردنەوەى هەناردەى نەوتى هەرێم
دواى چاوەڕوانییەکى زۆر
وەزارەتى نەوت: بەبێ کێشە هەناردەى نەوتى هەرێم دەستیپێکرد
964+
وریا فەتاح
وەزارەتى نەوتى عێراق دەستپێکردنەوەى هەناردەى نەوتى هەرێمى کوردستانى راگەیاند و دەڵێت: بەبێ کێشە پڕۆسەکە دەستیپێکردووە.
وەزارەتەکە لە راگەیەنراوێکدا بڵاوى کردەوە، بەهەماهەنگى لەگەڵ وەزارەتى سامانە سروشتییەکان، کاتژمێر 6ـى بەیانى ئەمڕۆ شەممە ڕێکەوتی 27.9.2025، پرۆسەی هەناردەکردنەوەی نەوتی خاو لە هەرێمەوە لەڕێگەی هێڵی عێراق – تورکیا دەستیپێکردەوە.
وەک باسکراوە، هەناردەکردنەوەکە بە خێراییەکى بەرز و بەشێوەیەکى کامڵ و رێک و پێک بووە، بەبێ تۆمارکردنی هیچ کێشەیەکی تەکنیکی، ئەمەشى بە رەنگدانەوەی سەرکەوتنی هەوڵە هاوبەشەکانی نێوان حکومەتی فیدراڵی و حکومەتی هەرێم زانیوە لە بەدیهێنانی ئەم دەستکەوتە گرنگەدا.
“ئەم پێشهاتە هەنگاوێکی دیارە بەرەو بەهێزکردنی بەڕێوەبردنی سامانی نیشتمانی بە گیانی هاوبەشی و هەماهەنگیی باڵا، کە بەشدار دەبێت لە مسۆگەرکردنی بەردەوامیی هەناردەی نەوت و پشتگیریکردنی ئابووریی نیشتمانی”، وەزارەتى نەوتى عێراق وا دەڵێت.
