دوای نزیکەی پێنج رۆژ ئاگرەکەی پێنجوێن کۆنتڕۆڵکرا

+964

کامیار کەمال – پێنجوێن

دوای نزیکەی پێنج رۆژ، دواجار ئاگرەکەی سنووری پێنجوێن کۆنتڕۆڵ کرا کە بەهۆیەوە زیاتر لە هەزار و 900 دۆنم لە پوش و پاوان و دارستان سووتاوە.

هێمن ئیبراهیم قایمقامی قەزای پێنجوێن بە 964ـی وت، دوای کاتژمێر 6:40 خولەکی ئێوارەی ئەمڕۆ شەممە 30.8.2025 ئاگادار کراینەوە کە ئاگرەکە لە دیوی گوندی نزارە بەتەواوەتی کۆنتڕۆڵکراوە، بەڵام تیمەکان هەر لەوێ ماون و چاودێری پاشماوەی ئاگرەکە دەکەن بۆ ئەوەی جارێکی دیکە سەرهەڵنەداتەوە”.

قایمقامی پێنجوێن لەڕێی 964ـەوە سوپاسی سەرجەم تیمەکانی ئاگرکوژێنەوە، پۆلیس، رێکخراوەکانی ژینگەپارێز، خەڵکی ناوچەکە و هەموو ئەو لایەنانەی کرد کە بەشداربوون لە کوژاندنەوەی ئاگرەکە.

نزیکەی پێنج رۆژ لەمەوبەر لە گوندی هەڵاڵاوای پێنجوێن ئاگرێکی گەورە سەریهەڵدا و هەرچەندە چەند جارێک کۆنتڕۆڵکرا بەڵام سەریهەڵدایەوە کە بەپێی راگەیەنراوێکی رێکخراوی ملەکەوە لە ئاگرەکەدا هەزار و 930 دۆنم پوش و پاوان و دارستان سووتاوە، جگە لەوەش دوو ژینگەپارێزی خۆبەخش برینداربوون و لەئێستادا لە نەخۆشخانە لەژێر چاودێری پزیشکیدان، ئەمڕۆش پۆلیسی دراستان و ژینگەی سلێمانی رایگەیاند، کەسێک بەتۆمەتی نانەوەی ئاگرەکە دەستگیر کراوە.

پێداچوونەوە؛ شۆڕش قادری

خۆبەخشێک زیاتر لە 30 کاتژمێر رووبەڕووی ئاگرەکەی پێنجوێن بووەتەوە

لە ئاگرەکەی پێنجوێن؛ هەزار و 930 دۆنم دارستان سوتاوە