محەمەد شیاع سودانی سەرۆک وەزیرانی عێراق
"کار بۆ دۆزینەوەی هێرشکارەکان دەکەین"
سودانی: هێرشی سەر کێڵگە نەوتییەکانی هەرێم تیرۆرستی بوون
964+
ژووری هەواڵ
محەمەد شیاع سودانى، سەرۆک وەزیرانى عێراق رایگەیاند، ئەو هێرشە درۆنییانەی کە لە چەند رۆژی رابردوودا بۆسەر کێڵگە نەوتییەکانی هەرێمی کوردستان ئەنجامدران، کاری تیرۆرستین و کار بۆ دۆزینەوەی هێرشکارەکان دەکەن.
سودانی لە چاوپێکەوتنێکدا لەگەڵ ئاژانسی ئەسۆشیەیتد پرێس رایگەیاند، لیژنەیەکی هاوبەش لە نێوان هەرێم و بەغداد پێکهێنراوە و لێکۆڵینەوە دەکات بۆ دۆزینەوەی ئەو لایەنانەی ئەم کارە تیرۆرستییەیان ئەنجامداوە.
سودانی دەڵێت، “پەرە بە تواناکانمان دەدەین بۆ دۆزینەوەی هێرشکارانی درۆنەکان و سەرچاوەی هەڵدانیان”.
سودانی باسی لە پێویستی کشانەوەی هاوپەیمانان لە عێراق کرد و وتی، مانەوەیان پاساوی داوەتە گرووپە چەکدارەکان لە دەرەوەی دەوڵەت خۆیان پڕچەک بکەن و بە کشانەوەی هاوپەیمانان ئەو پاساوە نامێنێت.
سەرۆک وەزیرانی عێراق باسی لە توانای بەرگریی ئاسمانیی عێراق کرد و رایگەیاند، لە کاتی شەڕی ئێران و ئیسرائیلدا توانیویانە 29 هێرش “بۆ سەر ئیسرائیل و بنکە سەربازییەکانی ئەمریکا لە عێراق” پوچەڵ بکەنەوە.
