“بڕینی 1٪ـی موچە لەسەر داواکاری وەزارەتی پلاندانانی عێراقە و تەنیا بۆ یەکجارە”

964+

شۆڕش قادری

وەزارەتی دارایی و ئابووری هەرێمی کوردستان دەڵێت، بڕینی 1٪ـی موچەی بنەڕەتی فەرمانبەران لەسەر داواکاری وەزارەتی پلاندانانی عێراقە و تەنیا بۆ یەکجارە.

بەڕێوەبەرایەتی گشتی ژمێرکاری لە وەزارەتی دارایی و ئابووری هەرێمی کوردستان لە روونکردنەوەیەکدا بڵاویکردووتەوە، لەگەڵ دابەشکردنی موچەی مانگی ئایاری فەرمانبەران لە رێگەی پڕۆژەی هەژماری من، چەند پرسیارێک لای فەرمانبەران دروست بووە و لەکاتی وەرگرتنی مووچەکانیان بڕەپارەیەکیان بەراورد بەمانگەکانی پێشوو لێبڕاوە.

لە روونکردنەوەکەدا هاتووە؛

1- سەبارەت بەو لێبڕینە کە بڕەکەی تەنها لە ( 1٪ )ی مووچەی بنەڕەتی فەرمانبەرانە و لەسەر داواکاری وەزارەتی پلاندانانی عێراق بەمەبەستی تۆمارکردن و دروست کردنی ژمارەی وەزیفی لەلایەن وەزارەتی دارایی حکومەتی فیدراڵەوە بڕدراوە.

2- ئەو لێبڕینی ( 1٪ )ە بۆ سەرجەم فەرمانبەرانی عێراق بووە، تەنها فەرمانبەرانی هەمیشەیی و ئەو فەرمانبەرە گرێبەستانە دەگرێتەوە کە مووچەکانیان لەلایەن وەزارەتی دارایی فیدراڵەوە خەرج دەکرێت، بەهیچ جۆرێک خانەنشینان و سوودمەندانی چاودێری کۆمەڵایەتی ناگرێتەوە.

3- ئەو لێبڕینە تەنها بۆ یەک جارە و لەسەر مووچەی مانگی ئایار لەلایەن حکومەتی فیدراڵەوە جێبەجێ کراوە.

بەڕێوەبەرایەتییەکە راشیگەیاندووە، سەرجەم فەرمانبەران دڵنیا دەکەینەوە ئەو بابەتە هیچ پەیوەندی بە پڕۆژەی هەژماری منەوە نییە.

دوای 86 رۆژ خانەنشینانی سلێمانی بە نیگەرانییەوە موچەكانیان وەرگرت