"76 رۆژە موچە دواکەوتووە"
مامۆستایانی خوێندنی کوردی لە کەرکوک خێوەتیان هەڵدا
964+
کاروان ساڵحی – کەرکوک
مامۆستایانی خوێندنی کوردی لە بەردەم نوسینگەی پەرلەمانی عێراق لە کەرکوک خێوەتیان هەڵدا و دژی دواکەوتنی موچە دەنگیان هەڵبڕی.
مامۆستا کازم ئەحمەد بە 964ـی وت، “ئەمڕۆ 76 رۆژە موچە دواکەوتووە، بۆیە بڕیارماندا خێوەتی مانگرتن لەپێناو ژیان لەبەردەم نوسینگەی پەرلەمان وەک دەزگای شەرعی و یاسادانانی عێراق هەڵبدەین”.
وتیشی، “بەهەموو ناوچە جێناکۆکەکان 13 هەزار موچەخۆرین، بەڵام بەشێک لە موچەخۆران، لەبەرئەوەی سەربە حزبن، ناوێرین داکۆکی لە مافی خۆیان بکەن و ناڕەزایی دەرببڕن”.
سەبارەت بەو بابەتە، رزگار مستەفا بەڕێوەبەری نوسینگەی پەرلەمانی عێراق لە کەرکوک بە 964ـی وت، مامۆستایان بەشێوەی فەرمی ئاگاداری ئەوانیان نەکردووەتەوە کە خۆپیشاندان دەکەن و مۆڵەتیان فەرمیان نییە، بۆیە هێزە ئەمنییەکان دەیانەوێ خێمەکەیان لاببەن.
ئاماژەی بەوەشکرد، یاداشتێکیان لێ وەرگرتوون و یاداشتەکە رادەستی ئەندامانی پەرلەمانی عێراق دەکەن.
پێداچوونەوە؛ شۆڕش قادری
مامۆستایانی خوێندنی کوردی کەرکوک گردبوونەوە
