چەند رێگایەک داخران
لە کۆیە و پشدەر خۆپیشاندان دەستیپێکردەوە
964+
دەریا ئەحمەد – کۆیە
محەمەد عەلی – راپەڕین
جارێکی تر دانیشتووانی چەند گوندێکی کۆیە و دەڤەری پشدەر هاتنەوە سەر جادە و دژی کەمی کارەبا و نەبوونی خزمەتگوزاری گردبوونەوە.
ئێوارەی ئەمڕۆ سێشەممە 14.7.2025 دانیشتووانی هەریەکە لە گوندەکانی تۆبزاوا و شیلە و شێخەروان لە سنوری قەزای کۆیە و لە نزیک بازگەی تۆبزاوا رێگای هاتوچۆی نێوان کۆیە – هەولێریان بەتەواوی داخست.
هەنگاو سەڵاح دانیشتوویەکی ئەو دەڤەرە بە 964ـی وت، “زۆرمان پێناخۆشە کە رێگەکەمان بەڕووی خەڵکدا گرتووە، بەڵام ناچاربووین ئەمە بکەین، چونکە سەردانی بەرپرسانی ئیدارەی کۆیەمان کردووە و گرفتەکەمان پێگەیاندوون و پێیان وتین بۆتان چارەسەر دەکەین بەڵام نەیانکرد”.
ئاماژەی بەوەشکرد، لەئێستادا رێگەکەیان داخستووە و تا وەڵامی کۆنکرێتیان نەدرێتەوە، نایکەنەوە بەڵام لەوانەیە بۆ ئۆتۆمبێلی بچووک بیکەنەوە.
هاوشانی گوندنشینیانیش، ژمارەیەک لە دانیشتووانی شاری کۆیە بۆ پشتیوانی داواکانیان، چونەتە پاڵ خۆپیشاندەران و ئەوەش بۆتەهۆی ئەوەی ژمارەیەکی زۆر لە ئۆتۆمبێلی بچووک و بارهەڵگر لە هەردوو ئاڕاستەی هاتن و رۆیشتن لەسەر رێگاکە بمێننەوە.
هەر دژی کەمی کارەبا و نەبوونی خزمەتگوزاری پێویست، لە دەڤەری پشدەریش، ژمارەیەک گەنج لەسەر پردی ژاراوە گردبوونەوە و رێگای رانیە بۆ قەڵادزێیان بۆ ماوەیەک داخست.
پێداچوونەوە؛ شۆڕش قادری
