“تێكەڵی ململانێیە سیاسییەكانی پەیوەست بە هەڵبژاردن نابین”

964+

ئەرسەلان عەبدوڵا

دادگای باڵای فیدراڵیی عێراق رایگەیاند، تێكەڵی ململانێیە سیاسییەكانی پەیوەست بە هەڵبژاردنی عێراق نابن و پابەندبوونی خۆیان بە بێلایەنی دووپاتكردەوە.

دادگای باڵای فیدراڵیی عێراق، ئەمڕۆ دووشەممە 7.7.2025، لە راگەیاندراوێكدا دوای یەکەمین کۆبوونەوەی راوێژکارییان لە سەردەمی سەرۆکایەتییە نوێیەکەیدا ئەوەیان خستەڕوو، تێكەڵی ململانێ سیاسییەکانی پەیوەست بە هەڵبژاردنەکانی داهاتووی عێراق نابن.

دادگاكە هەروەها شەش بڕیاری دەرکرد، كە ئەمانەن:

یەکەم: جەختکردنەوە لەسەر پابەندبوونی دادگای باڵای فیدراڵی بە دەسەڵاتە دەستوورییەکانی، وەک لە مادەکانی (52 و 93)ی دەستوور و ماددەی (4)ی یاسای ژمارە (30)ی ساڵی 2005، وەک بە یاسای ژمارە (25)ی ساڵی 2021 هەموار کراوەتەوە، خۆبەدوورگرتن لە فراوانکردنی ئەو دەسەڵاتانە.

هەر لە کۆبوونەوەکەدا جەخت لەسەر سەربەخۆیی دادگا لە بڕیاردان و قەدەغەکردنی دەستوەردانی سیاسی لە کارەکانیدا کرایەوە.

دووەم: جەختکردنەوە لەسەر پابەندبوونی دادگای باڵای فیدراڵی بە بێلایەنی و پاراستنی مەودای یەکسان لە هەموو لایەنە سیاسییەکان و دڵنیابوون لەوەی کە ئامانج و ئامانجی سەرەکیی پاراستنی سیستمی سیاسیی عێراق و رێزگرتنە لە مافە دەستوورییەکانی سەرجەم پێکهاتەکانی گەلی عێراق.

سێیەم: دەستوەرنەدان لە کاری دەسەڵاتی یاسادانان و جێبەجێکردن، رێزگرتن لە بڕیارەکانیان کە دەکەوێتە ناو ناوەڕۆکی ئەو ئەرکانەی کە دەستوور پێیانی داوە، جگە لەوانەی کە پێشێلکردنی دەستوور پێکدەهێنن، کە دەکرێت بە تۆمارکردنی داوای یاسایی دەستووری لەم بارەوە چارەسەر بکرێت، بەمەش بنەمای جیاکردنەوەی دەسەڵاتەکان دەچەسپێنرێت.

چوارەم: جەختکردنەوە لەسەر ئەوەی کە رۆڵی دادگای باڵای فیدراڵی سەبارەت بە هەڵبژاردنە گشتییەکانی داهاتوو بۆ ئەندامیەتی لە ئەنجومەنی نوێنەران بەپێی مادەی (93/حەوتەم)ی دەستوورە، هەروەها دەستوەردان ناکات لە ململانێ سیاسییەکان لەسەر ئەم پرسە.

پێنجەم: جەختکردنەوە لەسەر ئەوەی، دادگای باڵای فیدراڵی پێکهاتەیەکی دەسەڵاتی دادوەرییە، لەسەر بنەمای بڕگەکانی مادەی (89)ی دەستوور، هەروەها بە پەرۆشەوە لەگەڵ ئەنجومەنی باڵای دادوەری و پێکهاتەکانی تری دەسەڵاتی دادوەری کار دەکات، بۆ بەرەوپێشبردنی چەمکی دادپەروەری و رێزگرتن لە بڕگەکانی دەستوور و یاساکان.

شەشەم: جەختکردنەوە لەسەر هاوکاری لەگەڵ لایەنە پەیوەندیدارەکان بە ئەنجامدانی سیمیناری راوێژکاری و دیالۆگ لەگەڵ زانایانی یاسای دەستووری و پرۆفیسۆرەکان، کە یارمەتیدەر دەبێت لە پەرەپێدانی کارەکانی دادگای دەستووری.

نۆ دادوەرەكەی دادگای فیدڕالی پەشیمان بوونەوە