داوای راگرتنی دروستکردنی پڕۆژەیەک دەکەن لە ناوچەکەیان
بەشێک لە دانیشتووانی هانا سیتی گردبوونەوە
964+
عەبدولعەزیز خالند – هەولێر
بەهۆی دروست کردنی مۆڵ و بازاڕ لە نێو پرۆژەکەیان بەشێک لە دانیشتووانی پڕۆژەی هانا سیتی شاری هەولێر گردبوونەوە و داوای راگرتنی پڕۆژەکە دەکەن.
حاجی یاسین، هاوڵاتییەکی هانا سیتیە و بە 964ـی وت، “ئێمە نە پارک، نە قوتابخانە، نە بنکەی تەندروستیمان و نە شوێنێک یاری کردنمان هەیە بۆ منداڵان، کەچی دێن و مۆڵ و بازاڕمان بۆ دروست دەکەن، هەزار و هەشت خێزان لە نێو پڕۆژەکە دەژین، ئێمەش مرۆڤین پێویستمان بە خزمەتگوزاریە”.
وتیشی،” بڕیار وایە لێرە بازاڕ و تاوەر دروست بکرێت چونکە ئێمە ژیانمان نامێنێت بەو جۆرە، ئەو زەویانە پەیوەستن بە شووقەکانەوە”.
نیاز ساڵح، بەڕێوبەری شارەوانی چوار بە 964ـی وت، ”ئەوان ئاگادار کراونەتەوە کە ئەم کێشەیە هەیە و لە بەیانییەوە بەدواداچوونی بۆ دەکەن”.
پێداچوونەوە: ژێوار خدر
