کۆبوونەوەی ئومێد خۆشناو پارێزگاری هەولێر و سەید عەلی تورابی قایمقامی شنۆ – وێنە: پارێزگای هەولێر
"بەمنزیکانە دەکرێتەوە"
هەولێر و ورمێ دەیانەوێ هاموشۆکانیان زیاتر بکەن و مەرزێکی نوێ دەکەنەوە
964+
شۆڕش قادری
هەردوو پارێزگای هەولێر و ورمێ دەیانەوێ پەرە بە پەیوەندی و هاموشۆکانیان بدەن و بەمنزیکانە مەرزێکێ نوێ دەکەنەوە.
ئومێد خۆشناو پارێزگاری هەولێر بە 964ـی وت، لە میانی سەردانەکەیان بۆ ئێران و رۆژهەڵاتی کوردستان لەگەڵ رەزا رەحمانی پارێزگاری ورمێ و سەید عەلی تورابی قایمقامی شنۆ، بەجیا کۆبوونەتەوە و باسی کردنەوەی مەرزی کێلەشینیان کردووە.
رێککەوتنمان لەسەر کردنەوەی مەرزی کێلەشین کردووە و بەشێک لە رێگای مەرزەکەمان تەواو کردووە، لە قۆناغی کۆتایی داین و بەمنزیکانە دەکرێتەوە
“پێشتر رێککەوتنمان لەسەر ئەو بابەتە کردووە و هەردوولامان بەشێک لە رێگای مەرزەکەشمان تەواو کردووە، واتە لە قۆناغی کۆتایی داین و بەمنزیکانە دەکرێتەوە”، ئومێد خۆشناو وای وت.
مەرزی کێلەشین لە 33 کیلۆمەتری قەزای سیدەکانی سەربە ئێدارەی سەربەخۆی سۆرانە و لە دیوی رۆژهەڵاتی کوردستانیشەوە، 30 کیلۆمەتر لە شاری شنۆی پارێزگای ورمێ دوورە.
لە چەند رۆژی رابردوودا شاندێكی باڵای پارێزگای هەولێر بە سەرۆکایەتی ئومێد خۆشناو بەمەبەستی بەشداریان لە (پێشانگای ئێران – ئێکسپۆ 2025) سەردانی ئەو وڵاتەیان کرد و زنجیرەیەک دیدار و کۆبوونەوەیان لەگەڵ جێگری سەرۆک کۆمار و جێگری وەزیری دەرەوە و وەزیری پیشەسازیی و پارێزگارانی تاران، قەزوین، زنجان و ورمـێ ئەنجامدا.
بۆ نەورۆز و جەژنی رەمەزان 211 هەزار کەس لە ورمێوە هاتوچۆیان کردووە
