لە قەزای دوزخورماتوو
کەسێک خوێن لە لووتی هاتووە و گومان دەکرێ تووشی تای خوێنبەربوون بووبێت
964+
سیروان خورشید – دوزخورماتوو
لە قەزای دوزخورماتوو، حاڵەتێکی گومانلێکراوی تای خوێنبەربوون بوونی هەیە، تەندروستی قەزاکە پشکنینیان بۆ کەسەکە کردووە و رەوانەی تاقیگەی ناوەندی بەغدا- یان کردووە و چاوەڕێی ئەنجامەکەین ئەمڕۆ بگەرێتەوە.
کەسەکە، هەر گەیشتووتە نەخۆشخانە لە لووتیەوە خوێن هاتووە.
ئەمڕۆ هەینی 25.4.2025، محەمەد جومعە، بەڕێوەبەری نەخۆشخانەی گشتی دوزخورماتوو بە 964ـی وت، درەنگای شەوی رابردوو 24/25.4.2025 هاوڵاتییەکی بەتەمەن گەیەندرایە بەشی فریاکەوتنی نەخۆشحانەکەیان و دەرکەوت کە باری تەندروستی ناجێگیرە و تایەکی زۆری هەیە.
ئەو کەسە، پاش ماوەیەک مانەوی خوێن لە لووتی هاتووە، بۆیە راستەوخۆ پزیشک و تیمی تاقیگەیی پشکنینیان بۆ ئەنجام داوە و هاوڵاتییەکەیان بردووەتە ژوورێکی تایبەت و چاوەڕێی گەڕانەوەی ئەنجامی پشکنینەکەی دەکەن لە بەغداوە، کە گومان دەکرێ تووشی تا خوێن بەربوون بووبێت.
هاوڵاتییەکە، پیاوێکی تەمەن 75 ساڵە و دانیشتووی گەڕەکی رزگاری دوزخورماتووە، ئێستا لە ژوورێکی تاکە کەسی دەمێنێتەوە، ئەو بەرێوەبەرە وتی، سەرجەم رێکارە خۆپارێزییەکانیان دەستپێکردووە و چاوەڕێن هەر ئەمڕۆ ئەنجامی پشکنینەکە بگەڕێتەوە و دڵنیا دەبنەوە لە راستی و دروستی نەخۆشی هاوڵاتییەکە.
پێداچوونەوە: ئەحمەد مستەفا
