بەشى پێویست ئاوى تێدایە
بەنداوى دەربەندیخان لەخەم رەخساوە
964+
دیلان محەمەد جەزا- سلێمانى
بەنداوى دەربەندیخان بەڕێژەى 63% ئاوى تێدایە و بەڕێوەبەرەکەشى دەڵێت، کێشەى ئاومان نابێت تا کۆتایى ساڵ بەشى خۆمان و خوارو خۆمان و ناوچە عەرەبییەکانیش دەکات.
سامان ئیسماعیل بەڕێوەبەری بەنداوی دەربەندیخان قسەى بۆ 964 کرد و وتى،”بەراورد بە پارە رێژەى ئاوى بەنداوەکە کەمترە، بەڵام مەترسى کەمئاوى نابێت، ئەگەر خەڵکى خوار بەنداوەکە بەپێى پێویست بەکارى بهێنن و بەفیڕۆى نەدەن، بەشى تا کۆتایى ساڵ، ئاو هەیە”.
بەنداوەکە سێ ملیار مەتر سێجا ئاو دەگرێت، ساڵى رابردوو لە 3.5 بەتەواوەتى سەرڕێژ بوو، بەڵام ئەمساڵ تا ئەمڕۆ بەرێژەى 63% ئاوى تێدایە.
بەنداوى دەربەندیخان لە دواى بەنداوى دووکان دووەم گەورەترین بەنداوى هەرێمە، شوێنی جوگرافی بەنداوەکە دەکەوێتە قەزای دەربەندیخان و لەسەر ڕوباری سیروانە کە لە ساڵى 1955 دەست بە دروستکردنى کراوە و ساڵى 1961 تەواو بووە.
پێداچوونەوە: وریا فەتاح
