964+

ئەرسەلان عەبدوڵا

وتەبێژی حكومەتی هەرێمی كوردستان رایگەیاند، ئەمڕۆ سەرۆك وەزیرانی عێراق محەمەد شیاع سودانی بە سەردانێك دەگاتە هەولێر و پەیوەندی و كێشەكانی نێوان هەولێر و بەغدا ناوەڕۆكی گفتوگۆیەكان دەبێت.

پێشەوا هەورامانی، ئەمڕۆ شەممە 12.4.2025 بە تۆڕی 964ی راگەیاند، ئەمڕۆ سەرۆك وەزیرانی عێراق محەمەد شیاع سودانی دەگاتە هەولێر و لە لایەن سەرۆك وەزیرانی كوردستان مەسرور بارزانی پێشوازی لێدەكرێت.

وتیشی، ئامانجی هاتنەكە، گفتوگۆكردنە لە بارەی پەیوەندییەكان و هەروەها ئەو كێشانەی لە نێوان هەردوولا هەیە، بە ئامانجی چارەسەركردن، كە بەشێكی ئەو كێشانە بە ئاراستەی چارەسەركردن هەنگاوی باشیان بڕیوە، بەڵام هەندێكیان هێشتا پێویستیان بە گفتوگۆی زیاترە.

بە گوێرەی زانیارییەکانی 964 سودانی کاتژمێر 11:00 دەگاتە هەولێر.

دیارترین كێشەكانی ئێستای نێوان بەغدا و هەولێر، بابەتی هەناردەكردنی نەوتی هەرێم بۆ دەرەوە و دابینكردنی موچەی فەرمانبەرانی كوردستانە.

سودانی: هەوڵی زۆر بۆ دەستپێکردنەوەی هەناردەکردنی نەوتی هەرێم دەدەین

964+

شڤان عەبدوڵا – زاخۆ

دوای ئەنجامە خراپەکانی ئەم دوایەیی یانەی زاخۆ لەخولی ئەستێرەکانی عێراق، راهێنەرە قەتەریەکەی یانەی زاخۆ دەستی لەکارکێشایەوە و کارگێری یانەکەش قبوڵیان کرد.

تەڵال بەلوشی دوو وەرزە لە خولی ئەستێرەکانی عێراق سەرپەرشتی مەشقی یانەی زاخۆ دەکات، لەوەرزی رابردوو توانی ریزبەندی چوارەم لەخولەکەدا مسۆگەر بکات و ئەم وەرزەش لەپلەی سێیەمی رێزبەندیەکەیە، دوای دۆڕانی یانەی زاخۆ بۆ سێ یاری لەسەر یەک، هاندەرانی زاخۆ داوایان کرد راهێنەرەکە دەستلەکاربکێشتەوە و ئەویش بڕیاری وازهێنانی دا و دەستی لەکارکێشایەوە.

دلژار عەدنان، ئەندامی دەستەی کارگێری یانەی زاخۆ بە 964ـی وت، تەڵال دەستی لەکارکێشایەوە و ئێمەش رەزامەندیمان لەسەر دەستلەکارکێشانەوەی پێشاندا و لەکاتێکی نزیکدا بەدیلێکی گونجاوی بۆ دادەنێن.

ئەمە لەکاتێکدایە پێش دوو یاری راهێنەرەکە خۆی داوای دەستلەکارکێشانەوەی کردبوو، یانەکەش پێیان وابوو مانەوەی راهێنەرەکە تا کوتاییهاتن بەخولەکە باشتر دەبێت، بەڵام بەهۆی فشاری زۆری هاندەرانی زاخۆ کوتا جار دەستلەکارکێشانەوەکەی قبوڵکرا.

پێداچوونەوە: توانا نەقی

دوو یارییە بەدوای یەکدا یانەی زاخۆ تامی بردنەوە ناکات