لە ئێران بوو
تەڵعەت نوری، فۆتۆگرافەری وەرزشی كۆچی دوایی كرد
964+
ئەرسەلان عەبدوڵا
دوو سەرچاوە بە 964 سپۆرتیان راگەیاند، فۆتۆگرافەری وەرزشیی دێرین “تەڵعەت نوری” لە وڵاتی ئێران كۆچی دوایی كردووە، كە بۆ چارەسەری نەخۆشی چووبووە ئەوێ.
كوڕی تەڵعەت نوری و هەروەها رێكخراوی فۆتۆ ئەوەیان بە 964 راگەیاند، كە تەڵعەت نوری كۆچی دوایی كردووە و ئەمڕۆ هەواڵەكە پشتڕاستكرایەوە، دوای ئەوەی چوار رۆژ بوو پەیوەندییە تەلەفۆنییەكانی خێزان و بنەماڵەكەی وەڵام نەدەدایەوە.
هاوكات شێرزاد رەسول سەرۆكی رێكخراوی فۆتۆ ئەوەی بە 964 راگەیاند، لە رێگەی كەسوكارەكەیەوە هەواڵە راستەكەیان پێگەیشت و بەداخەوەن بۆ كۆچی دوایی تەڵعەت نوری.
وتیشی، هەفتەیەكە سەردانی ئێرانی كردووە بۆ وەرگرتنی چارەسەر، بەڵام لە شاری تەورێز گیانی لەدەستداوە.
تەڵعەت نوری وەرزشوانێكی دێرینی هەولێرە لە حەفتاكان وەرزشوانی گۆڕەپان و مەیدان بووە، دواتر لە سەرەتای نەوەدەكان رووی لە كاری وێنەگری وەرزشی كرد و لە یاریگەكانی كوردستان وێنەی رووداوە وەرزشییەكانی دەگرت، ماوەیەك لە یانەكانی هەولێر و هندرێن وێنەگری تایبەتی بووە، هەروەها وێنەكانی لە رۆژنامە و گۆڤارە وەرزشییەكانی پێشوو لە كوردستان بڵاودەبوونەوە.
تەڵعەت نوری بەم دواییە دووچاری نەخۆشی بوو، چەند جارێكیش بۆ وەرگرتنی چارەسەر سەردانی ئێرانی كردووە.
