ناوەندی عێراق بۆ مافی مرۆڤ:
حاڵەتەكانی تووشبوون بە ئایدز لە عێراق بەرزبوونەتەوە و چاوپۆشی لێدەكرێت
964+
محەمەد فاتیح
ناوەندی عێراق بۆ مافی مرۆڤ ئاشكرای كرد حاڵەتەكانی تووشبوون بە ڤایرۆسی ئایدز له عێراق بەرزبوونەتەوە، بەڵام چاوپۆشی لێدەكرێت، داواشیان كرد رێگایەكی تەندروست دابنرێت بە مەبەستی بەرەنگاربونەوەی ڤایرۆسەكە و بەرگرتن لە بڵاوبوونەوەی.
تا ئێستا چاوپۆشی لە دۆسیەکانی نەخۆشی ئایدز دەكرێت و فشار خراوەتە سەر چەند لایەنێكی جیاواز تا ژمارەی راستەقینەی تووشبوان بەم ڤایرۆسە ئاشكرا نەكرێت و بشاردرێتەوە، ئەمە لێدوانی عەلی عەبادی سەرۆكی ناوەندی عێراقە بۆ مافی مرۆڤ بۆ 964.
ئەو دەڵێت: ناوەندەكەمان پێش نزیكەی سێ هەفتە بانگەوازى لە یەكێك لە پارێزگاكانی باكووری عێراقەوە (بەبێ ناوهێنانى پارێزگاکە) پێگەیشت سەبارەت بە تووشبونی هاوڵاتییەك بە ڤایرۆسی ئایدز لە رێگەی گواستنەوەی خوێنی پیسەوە و لیژنەیەك پێكهێنراوە بۆ ئەم مەبەستە، بەڵام تاكو ئێستا دەرئەنجامەكانی رانەگەیەندراوە و ترس هەیە راستییەكان پەردەپۆش بكرێن.
دەبێت پڕۆگرامی پەنجەمۆری گەڕانەوە چالاك بكرێتەوە لە دەروازە ئاسمانی و دەریایی و وشكانییەكانی عێراق، بۆ پشكنینی ئەو كەسانەی لە دەرەوەی وڵاتەوە دەگەڕێنەوە، هەروەها دەبێت وەزارەتی تەندروستیی عێراق نەخشەڕێگایەكی تۆكمە دابنێت بۆ پشكنین و گرتنەبەری هەڵمەتی هۆشیاری نیشتمانیی بەردەوام، بەمەبەستی ئاشكراكردنی حاڵەتەكانی تووشبوون و رێگریكردن لە بڵاوبوونەوەی ئایدز لە عێراقدا، عەلی عەبادی واى وت.
