وێنەی ئەو هاوڵاتییەی کە وون بووە
سۆران
هاوڵاتییەک سێ موچەی بەسەریەکەوە وەرگرتووە و چارەنووسی نادیارە
+964
ئاکام غەفور-سۆران
پیاوێکی تەمەن 60 ساڵانی خەڵكی سۆران، لە دوێنێ بەیانییەوە لە ماڵ هاتووەتە دەرەوە، بەڵام تا ئێستا نەگەڕاوەتەوە بێ سۆراغە، دەریشكەوتووە سێ موچەی خانەنیشینی لە بانك وەرگرتووە و دواتر دیار نەماوە.
هاوڵاتییەكە لە بەیانی دوێنێ پێنجشەممەوە لە ماڵ هاتووەتە دەرەوە و بە ماڵەوەی وتووە سەردانی نەخۆشخانەکە دەکات، هەڵامەتی لێ بووە، بەڵام لە دوای ونبوونی، کەسوکاری سەردانی نەخۆشخانە دەکەن و لەوێ نەبووە، پیاوەکە خانەنشین بووە سەردانی بانکیان کردووە لەوێ دیارە کە موچەی سێ مانگی وەرگرتووە، بەڵام لە دوای ئەوە دیار نەماوە.
عیمران عەلی، کەسوکاری ونبووەکەیە، قسەی بۆ 964 کرد و دەڵێت، “ئەم پیاوە لە ماڵەوە هیچ کێشەی نەبووە، نەخۆشی لەبیرچوونەوەشی نییە، کە لە ماڵ هاتووەتە دەرەوە مۆبایلی لە ماڵەوە جێهێشتوە، بۆیە نازانن بۆ کوێ رۆیشتووە، بەڵام زانیاری ئەوەمان هەیە کە پێش نیوەڕۆ لە گەلی عەلی بەگ بینراوە”.
دەشڵێت، “ونبووەکە سێ مانگە خانەشین بووە، موچەی سێ مانگی رابردووی وەرنەگرتوە، بەڵام دوێنێ پێنجشەمە لە دوای ئەوەی لە نەخۆشخانە نەبوو، سەردانی بانکمان کرد بۆ سۆراغی، لەوێ دیارە موچەی هەرسێ مانگەکەی وەرگرتووە بە یەکەوە، لە دوای ئەوە نەگەڕاوەتەوە ماڵ و بێ سۆراغە و بە دوایدا دەگەڕێین”.
ونبوەکە ناوی خانۆ عەبدولڕەزاقە، دانیشتووی گەڕەکی بەختیاریی شاری سۆرانە، کەسوکاری داواکارن هەر کەس بینیویەتی پەیوەندی بەم ژمارەیەوە بکەن 07504749813.
پێداچوونەوە: ئەرسەلان عەبدوڵا
