خەڵک دەیکڕن
کیسەڵی بەدبخەتیش تاتۆی بۆ داهێنرا
964+
عەبدولعەزیز خالند – هەولێر
ماوەیەکە کیسەڵی تاتۆکراو کەوتووەتە بازاڕەوە، کیسەڵەکە شێوەیەکی بچووکی هەیە، فرۆشیارێک دەڵێ، خواستی زۆری لەسەرە لەلایەن ژنان و منداڵانەوە.
ئەو کیسەڵانە لە ئێرانەوە هاوردە دەکرێن و لە بازاڕەکانی هەولێر ساغدەکرێنەوە.
محەمەد عەبدولڕەحمان، خاوەنی یەکێک لە دوکانەکانی باڵندەیە لە هەولێر بە 964ی، وت، ژنان و منداڵان زیاتر کیسەڵەکە دەکڕن، ئەوانەی دەیانەوێت رای بگرن بۆ جوان، رۆژانە رێژەیەکی باشی لێدەفرۆشین.
کیسەڵەکە لە کاتی بەخێوکردن هیچ کێشەیەکی تەندروستی بۆ بەخێوکەر دروست ناکات، ئەمە قسەی فرۆشیارەکەیە، بەڵگەی بۆ قسەکەی ئەوەیە ئەوانەی بردوویانە ئاماژەیان بە هیچ گرفتێک نەداوە.
کیسەڵەکان نرخیان لە بازاڕا جیاوازە، بەڵام ئەو فرۆشیارە دەڵێت، ئەو دانەی بە پێنج هەزار دینار دەفرۆشێ، کیسەڵەکەش بە تێپەڕبوونی کات گەورە دەبێت، بەڵام بە قەبارەیەکی کەم.
پێداچوونەوە: ئەحمەد مستەفا
