سبەی دەرگای قوتابخانەکان دەکرێنەوە
بایکۆتی مامۆستایان لە گەرمیان کۆتاییهات
964+
میلاد جەلال – گەرمیان
لە گەرمیان بایکۆتی مامۆستایان کۆتاییهات و سبەی دەرگای قوتابخانەکان دەکرێنەوە، بۆ قەرەبووکردنەوەی ئەو ماوەیەی کە بایکۆت کراوە، پشووەکانیان کەم دەکرێتەوە.
ئەمڕۆ دووشەممە 17.3.2025 لە بەڕێوەبەرایەتی پەروەردەی گەرمیان کۆبوونەوە لەگەڵ بەڕێوەبەری قوتابخانەکانی سنووری گەرمیان ئەنجامدرا و بڕیارە سبەینێ دەرگای قوتابخانەکان بکرێنەوە، 964 زانیویەتی زیاتر لە 150 بەڕێوەبەری قوتابخانەکان بەشداری کۆبوونەوەکە بوون.
عەدنان حوسێن، بەڕێوەبەری گشتی پەروەردەی گەرمیان بە 964ـی وت،”ھەموو بەڕێوەبەرەکان ئیمزایان کردووە و رازیبوون بەوەی کە لە سبەینێوە دەرگای قوتابخانەکان بکرێنەوە و کۆتایی بە بایکۆت بھێنن”.
“سەرجەم قوتابخانەکانی ناوشار و دەرەوەی شاریش لە سبەینێوە دەست دەکەنەوە بە خوێندن و پێویستە قوتابیان بڕۆنەوە دەست بە خوێندنی وانەکانیان بکەنەوە”، عەدنان حوسێن وای وت.
باسی لەوەشکرد، بۆ قەرەبووکردنەوەی ئەو ماوەیەی کە بایکۆت کراوە، بەپێی بڕیاری وەزارەتی پەروەردە، ھیچ پشوویەکیان نابێت جگە لە پشووی جەژنی رەمەزان، لەگەڵ وەزارەتیش قسە دەکەن بۆ کەمکردنەوەی مەنھەج.
دوای تاقیکردنەوەکانی وەرزی یەکەمی خوێندنی 2024-2025، مامۆستایانی گەرمیان بەهۆی دواکەوتنی موچە، بایکۆتی دەوامیان راگەیاند و جگە لە پۆلەکانی نۆ و 12، قوتابیان نەچوونەوە پۆلەکانی خوێندن.
پێداچوونەوە: شۆڕش قادری
لە گەرمیان بایکۆت مامۆستایان و قوتابیانی کردووە بە دوو بەشەوە
