کێڵگەیەکی نەوت لە عێراق _ وێنە: ئاژانسەکان
لەگەڵ كوردستانیش رێكنەكەوتن
عێراق دەیەوێت نەوتی زیاتری بەسڕە بە بەندەری جەیهان بنێرێتە توركیا
964+
ئەرسەلان عەبدوڵا
وەزیری نەوتی عێراق رایگەیاندووە، نزیكن لەوەی دۆسیەی هەناردەکردنی نەوت بۆ بەندەری جەیهانی تورکیا و ئەگەری زیادکردنی هەناردەکردنی نەوتی بەسرە بۆ بەندەرەكە، كارا بكەن.
لە راگەیەندراوێکدا وەزارەتی نەوتی عێراق ئەمڕۆ پێنجشەممە 6.3.2025 ئەوەی خستەڕوو، وەزیری نەوت حەیان عەبدولغەنی سەرپەرشتی کۆبوونەوەیەکی کرد بۆ تاوتوێکردنی کارەکانی لیژنەی هاوبەشی عێراق و تورکیا بە ئامادەبوونی ئەندامانی لیژنەکە لە وەزارەتەکانی عێراق.
ئەوەش باسكراوە، ئەو دۆسیانە گرنگن، كە پەیوەستن بە کاری لیژنەکەوە، بەتایبەتی دۆسیەكانی ئاو و نەوت.
لە راگەیاندراوەكەدا هاتووە، “وەزیر بە پێویستی دەزانێت دۆسیەی ئاو بە شێوەیەک کە خزمەت بە بەرژەوەندییەکانی عێراق بکات، كارا بكرێت، بە بەدەستهێنانی پشکێکی دادپەروەرانە لە ئاو بۆ عێراق، هەروەها ئاشكرای كردووە، نزیکە دۆسیەی هەناردەکردنی نەوت لە رێگەی بۆری نەوتی تورکیاوە بۆ بەندەری جەیهانی تورکیا و ئەگەری زیادکردنی هەناردەکردنی نەوتی بەسرە لە رێگەی ئەم بۆرییەوە كارا بكرێت”.
ئەم راگەیاندراوەی وەزارەتی نەوتی عێراق لە كاتێكدایە، ئەمڕۆ كۆبوونەوەی وەزارەتەكە لەگەڵ وەزارەتی سامانە سروشتییەكانی هەرێمی كوردستان و كۆمەڵەی پیشەسازیی نەوتی كوردستان “ئەپیكۆر” لە بارەی هەناردەكردنەوەی نەوتی كوردستان بۆ توركیا، بەبێ ئەنجام كۆتایی هات.
