پاشماوەی شەڕ بینایی لێ سەندووەتەوە
مامۆستایەکی نابینا تەراویح بۆ خەڵکی پێنجوێن دەکات
964+
کامیار کەمال – پێنجوێن
هاوڵاتییەکی پێنجوێن لە تەمەنی دە ساڵییەوە بەهۆی پاشماوەی تەقینەوە چاوەکانی لەدەستداوە، بەڵام نەوەستاوە، نیوەی قورئانی لەبەرکردووە و بەکالۆریۆسی لە زمانی عەرەبی بەدەستهێناوە.
ئێستاش پێشنوێژی بۆ زۆرێک لە هاوڵاتیانی پێنجوێن دەکات لە مزگەوتی قازی محەمەد.
ئیسماعیل عومەر، لە دایکبووی ساڵی 1984ە و لە گوندی دارۆخان لە دایکبووە و دوای لە دەستدانی چاوەکانی، لەلای چەند مامۆستایەکی ئایینی قورئانی پیرۆزی خوێندووە و وەک خۆئی دەڵێت، نیوەی قورئانیشی لەبەر کردووە.
ئەو باس لەوەدەکات، بۆ لەبەرکردنی قورئانی پیرۆز چووەتە پارێزگای سلێمانی و لەگەڵ لەبەرکردنی قورئانی پیرۆز، لە ساڵی 2013ش توانیویەتی هەر لە زانکۆی سلێمانی بەشی زمانی عەرەبی تەواو بکات.
مامۆستا ئیسماعیل بە فەرمی مامۆستایە لە بنکەی لەبەرکردن و فێربوونی قورئان لە پێنجوێن، بەڵام جارجار پێشنوێژی دەکات لە مزگەوتی قازی محەمەدی پێنجوێن.
لە بارەی هەستەکانییەوە لە کاتی پێشنوێژی دەڵێت، واباشە نەزانیت کێ لە دواوە نوێژ دەکات، چونکە دەبێت ئیمام ئاگای لە قورئان و پێشنوێژییەکەی بێت و نەوەک بیر بکاتەوە کێ لە دوایەوە نوێژ دەکات، ئەمەش بۆ ئەوەی تەرکیزت تێک نەچێت.
پێداچوونەوە: ئەرسەلان عەبدوڵا
