دەزگای ئاسایشی هەرێمی کوردستان
بۆ رێگرى لە تەشەنەکردنى ئاڵۆزییەکان لەوێ بوین
ئاسایش: شەوى رابردوو کەس دەستگیر نەکراوە
964+
وریا فەتاح
دەزگاى ئاسایشى هەرێم لەسەر رووداوەکانى درەنگانێکى شەوى رابردووى عەربەت هاتە دەنگ و دەڵێت، بۆ رێگرى لە تەشەنەکردنى گرژییەکان لەوێ بوون و کەسیش دەستگیر نەکراوە.
لە راگەیەنراوەکەدا هاتووە،”دوای ئەوەی شەوی رابردوو لە نزیک شارۆچکەی عەربەت، بەهۆکاری رێگریکردن لە تێپەڕبوونی ژمارەیەک بارهەڵگر لەلایەن مامۆستایان و هاوڵاتيیان، سەرئەنجام بووە هۆی دروستبوونی گرژی و ئاڵۆزی لەنێوانیاندا و چەند شۆفێرێک و هاوڵاتییەک بریندار بوون”.
باسى لەوەشکردووە، ئاسایش وەک لایەنی جێبەجێکاری یاسا دەستبەجێ بەمەبەستی کۆنتڕۆڵکردنی ئەو بارودۆخە نەخوازراوە و رێگریکردن لە تەشەنەکردنی ئاڵۆزییەکان و سەلامەتی گیانی هەموو لایەک گەیشتنە شوێنی رووداوەکە و رێکاری یاسایی گرتەبەر بۆ هێورکردنەوەی بارودۆخەکە.
جەختیش دەکاتەوە، له ئێستادا هيچ كەس دەستگيرنەكراوه و هاوڵاتییە بريندارەكان لە نەخوشخانه نەماون.
تا دوێنێ بۆ ماوەى دوو رۆژ بوو، بەشێک لە مامۆستایان و فەرمانبەران بۆ رێگرى لە تەنکەر و بارهەڵگرەکان رێگاى عەربەت سلێمانیان داخست، بەڵام شەوى رابردوو گرژى دروست بوو و ژمارەیەک رۆژنامەنوس و خۆپیشاندەریش بریندار بوون.
