سیستمی سۆلار یەكێكە لە شێوازەكانی سوودوەرگرتن لە وزەی خۆر، كە وزەی پاكە
ژووری بازرگانی ئەنجامی دەدات
سبەی كۆڕبەندی وزەی پاک لە هەولێر بەڕێوەدەچێت
964+
ئەرسەلان عەبدوڵا
ژووری بازرگانی و پیشەسازیی هەولێر بە هەماهەنگی كۆمەڵەیەک، كۆڕبەندێكی تایبەت بە وزەی پاک لە هەولێر ئەنجامدەدات.
كامەران محەمەد، ئەندامی ئەنجومەنی كارگێڕیی ژووری بازرگانی و پیشەسازیی هەولێر، ئەمڕۆ دووشەممە 20.1.2025 بە تۆڕی 964ی راگەیاند، سبەی لە باڵەخانەی ژووری بازرگانیی هەولێر كۆڕبەندێک لە ژێر ناونیشانی “بەیەكەوە بەرەو ئایندەیەكی پاک و بەردەوام، پشتبەستن بە وزەی پاک” لە لایەن ژووری بازرگانی و پیشەسازیی هەولێر بە هەماهەنگی (كۆمەڵەی بەیەكەوە بۆ پاراستنی مرۆڤ و ژینگە) رێكدەخرێت.
وتیشی، كۆڕبەندەكە دەرفەتێكە بۆ بەشداریكردن لە گفتوگۆ لە بارەی وزەی پاک و ئاشنابوون بە وردەكارییەكانی دەستپێشخەرییەكەی بانكی ناوەندی عێراق و رۆڵی لە پشتیوانیكردنی دارایی بۆ گواستنەوە بۆ وزەی پاک.
كامەران محەمەد ئاماژەی بەوە دا، كۆڕبەندەكە هەروەها دەرفەتێكە بۆ بنیادنانی پەیوەندی و هاوبەشیی ستراتیژی لەگەڵ پسپۆڕان و دامەزراوە پێشەنگەكانی بواری وزەی پاک.
بڕیارەكە كۆڕبەندەكە كاتژمێر 10ی بەیانی دەستپێبكات و یەک رۆژ دەخایەنێت.
وزەی پاک خۆی لە تیشکی خۆر، بای بەهێز، ئاو و هەندێک جۆری رووەک دەبینێتەوە، كە بۆ بەرهەمهێنانی كارەبا و سووتەمەنی سوودی لێ وەردەگیرێت.
لە هەرێمی كوردستان و عێراق تا ئێستا زیاتر سوود لە تیشكی خۆی وەردەگیرێت بۆ بەرهەمهێنانی كارەبا و زیاتریش هەوڵەكان تاكەكەسییە و هاوڵاتییان خۆیان بەرهەمی دەهێنن.
