لە دوای هاشتاگی هونەرمەندان بڕیار درا
شانۆی رۆمانی لە کەرکوک دروست دەکرێت
964+
توانا نەقی
هونەرمەندانی کەرکوک کۆڵیان نەدا و هاشتاگیان دروست کرد و داویانکرد، سەرەنجام داواکەیان لەلایەن پارێزگاری ئەو شارەوە قبوڵکراو بڕیاردرا شانۆی رۆمانی کەرکوک دروست بکرێت.
ئەم بابەتە لەلایەن هونەرمەند نەژاد نەجمەوە جوڵێنرا دواتر و هەرزوو دەیان هونەرمەند لەکەرکوک و عێراق و کوردستان پشتیگیریان کرد و وتیان” بەڵێ بۆ دروستکردنی شانۆی رۆمانی کەرکوک”.
نەژاد نەجم هونەرمەند و شانۆکار بە 964ـی وت، ئەو بەڵێنەی پارێزگار پێمانی دابوو بۆ دروستکردنی شانۆی رۆمانی لە شاری کەرکوک جێبەجێ دەکرێت و داوای دیزاینی شانۆی رۆمانی لێکردم بۆ ئەوەی دەست بە پڕۆژەکە بکرێت.
وتیشی، دوو ساڵە ئەو داوایەمان کردووە، بەڵام ئێستا لە ماوەی یەک رۆژدا و لە دوای پۆستێک کە ناوی دەیان هونەرمەندی کوردستان و کەرکوک و عێراق و تەنانەت ئەو هونەرمەندانەشی لە دەرەوەی وڵاتن هاشتاگمان راگەیاند پارێزگاری کەرکوک هاتە سەر خەت و یەکسەر بەڵێنی جێبەجێکردنی دا.
نەژاد ئاماژەی بەوەشکرد، رێبوار تەها پارێزگاری کەرکوک دەمودەست پارچە زەیەک کە بۆ باخچە دەستنیشانکرابوو لە دەروازەی کەرکوک – سلێمانی دیاریکرد بۆ دروستکردنی شانۆی رۆمانی و ئێستا چاوەڕێ دەکەن ئێمە دیزاینەکەیان پێ بدەین و ئەوانیش دەست بە جێبەجێ کردنی بکەن.
