وەک یەکەم بەڕێوەبەرایەتی 10 ئۆتۆمبێلی سفر کیلۆمەتر درا بە بەرگریی شارستانیی سۆران

964+

شۆڕش قادری

وەک یەکەم بەڕێوەبەرایەتی لە هەموو هەرێمی کوردستان، 10 ئۆتۆمبێلی سفر کیلۆمەتر درا بە بەرگریی شارستانیی سۆران و لە چەند رۆژی داهاتوودا ئۆتۆمبێلی دیکەشیان پێدەدرێت.

رۆژی سێشەممە 17.12.2024، 10 ئۆتۆمبێلی خزمەتگوزاری لە جۆری پیکاب میتسیۆبیشی نوێ و سفر کیلۆمەتر بۆ بەڕێوەبەرایەتیی بەرگریی شارستانیی سۆران دابینکران، بە مەبەستی باشتر راییکردنی کاروبارەکانیان.

“ئەو ئۆتۆمبێلانە خزمەتگوزارین و بۆ گواستنەوی تیمەکانمان و کەرەستە و تەرم و بریندارەکان لە کاتی رووداوە نەخوازراوەکان بەکار دەهێنین”، کاروان میراودەلی بەڕێوەبەری بەرگریی شارستانیی سۆران وای بە 964 وت.

وتیشی، بڕیارە بەمنزیکانە چەند ئۆتۆمبێلی دیکەی گەورە لە جۆری تۆیۆتا مێکزەمینی و ئۆتۆمبێلی ئاگرکوژێنەوە رادەستیان بکرێت.

ئاماژەی بەوەش کرد، زۆرجار هەبووە تیمەکانی بەرگریی شارستانیی سۆران بەهۆی کەمیی ئۆتۆمبێلەوە، ناچاربوون بە ئۆتۆمبێلی مەدەنی و هاوڵاتیان خۆیان بگەیەننە شوێنی رووداوەکان و هەندێک جاریش درەنگ کەوتوون.

کاروان میراودەلی ئاشکراشی کرد، ئەوان یەکەم بەڕێوەبەرایەتین لە هەموو هەرێمی کوردستان کە ئەو 10 ئۆتۆمبێلەیان وەرگرتووە.

بەرگریی شارستانیی سۆران هەر مرۆڤەکان رزگار ناکات؛ بەهانای ئاژەڵەکانیشەوە دەچن

کارمەندانی بەرگری شارستانی سۆران فێرکران بە شاخدا سەرکەون