سەنتەری تیشکی شەهید د. مەجید لە کۆیە وێنە: تەندروستی کۆیە
ئیتر مەڕۆنە شارەکانی دیکە بۆ پشکنین
ئامێری تیشکی MRIـی تەندروستی کۆیە چاککراوەتەوە
964+
ژێوار خدر
ئیتر پێویست ناکا هاوڵاتیانی سنووری قەزای کۆیە، بۆ پشکنینی MRI سەردانی شارەکانی دیکە بکەن، ئامێرەکە چاککراوەتەوە و کێشەی نەماوە و دەتوانن لە ئەمڕۆوە بەیانیان و ئیواران بڕۆن و پشکنینەکانتان ئەنجام بدەن.
بەڕێوەبەرایەتی گشتی تەندروستی کۆیە ئەمڕۆ دووشەممە 9.12.2024 رایگەیاند، ئێستا لە سەنتەری تیشکی شەهید د.مەجید ئامێری تیشکی MRI چاککراوەتەوە هاوڵاتییان دەتوانن لە بەیانیان و ئێواران سەردانی نەخۆشەخانەکە بکەن.
هاوکار عەلی، وتەبێژی تەندروستی کۆیە بە 964ـی وت، ماوەی چەند مانگێکە ئەو ئامێرەی نەخۆشخانەکە لەکارکەوتووە و ئێستا چاککراوەتەوە و کێشەی نەماوە.
وتیشی، رۆژانە 12 بۆ 13 نەخۆش پشکنیاین بۆ دەکرێت، بەیانیان نرخی پشکینینەکە 15 هەزار دینار و ئێوارانیش 60 بۆ 65 هەزار دینارە.
روونیشیکردەوە، ئامێری CT scanەکەشمان پێویستی بە نوێکردنەوە هەیە، رەزامەندیمان وەرگرتووە و بڕیارە دانەیەکی تازەمان بۆ دابین بکرێت و جگە لەو ئامێرە پێوسیتمان بەهیچ ئامێرێکی دیکە لە نەخۆشخانەکەمان.
ئامێری MRI ئامیرێكی پزیشكیە كە لەرەی موگناتیسی و شەپۆلی رادیۆیی بەكاردێنێت بەمەبەستی پشكنین و بەدەستهێنانی وێنەی تەواو ووردی كەللەسەر و سەرجەم ئەندامەكانی دیكەی جەستە.
