چه‌ند دیمهنێك له چالاكییهكانى كه‌مپینه‌كه... وێنه: به‌ڕێوه‌به‌رایه‌تى چاودێری كۆمه‌ڵایه‌تى هه‌ولێر.
32 سمیناریان پێشكه‌ش كردوون
كه‌مپینى “سه‌لامه‌تى دیجیتاڵى” سه‌دان كچ و ژنى له هه‌ولێر و سۆران كۆكرده‌وه
964+
فه‌رهاد حه‌سه‌ن
زیاتر له 10 رۆژه كاره‌كانى کەمپینی سەلامەتی دیجیتاڵی بەردەوامە، كه‌مپینه‌كه له‌چوارچێوه‌ى هه‌ڵمه‌تى بەرەنگاربوونەوەی توندوتیژی دژی ژنان دەستیپێكردووه و سه‌رپه‌رشتیاری كه‌مپینه‌كه‌ش ده‌ڵێت، سه‌دان كچ و ژنمان له‌و بابه‌تانه سوودمه‌ند كردووە كه په‌یوه‌ندیان به بابه‌تى توندوتیژییه‌وه هه‌یه.
كه‌مپینه‌كه، له‌لایه‌ن بەڕێوەبەرایەتی گشتی چاودێری و گەشەپێدانی کۆمەڵایەتی ھەولێر و بەڕێوەبەرایەتی بەرەنگاربوونەوەی توندوتیژی دژی ئافرەتان و خێزانی هەولێر، له رۆژى 25.11.2924 ده‌ستیپێكردووه.
دڵان ئیسماعیل، سه‌رپه‌رشتیاری كه‌مپینه‌كه له به‌ڕێوه‌به‌رایه‌تى چاودێری و گه‌شه‌پێدانى كۆمه‌ڵایه‌تى به 964ـى راگه‌یاند سنوورى چالاكى و كاركردنى كه‌مپینه‌كه‌یان به‌ته‌نیا له‌ناو سه‌نته‌رى هه‌ولێر نییه، به‌ڵكو بۆ ئیداره‌ى سۆران، كۆیه، شه‌قڵاوه و مه‌خموریشی گرتووه‌ته‌وه.
وتیشی “له‌ماوه‌ى ئه‌م چه‌ند رۆژه‌دا تواندراوه له‌لایه‌ن تیمه‌كانمانه‌وه 32 سمینار پێشكه‌شی قوتابیان و خوێندكارانى كچ و سیمینارى تایبه‌تیش بۆ ژنان سازبكه‌ین”.
ئاماژه‌ى به‌وه‌شكرد تاوه‌كو ئێستا نزیكه‌ى هه‌زار و 800 كچ و ژن سوودمه‌ندى سیمیناره‌كانیان بوونه و ئامانجى سه‌ره‌كى كه‌مپینەكه‌ش خۆپاراستنه لە هه‌ڕه‌شه و مه‌ترسییه ئەلیكترۆنیه‌كانه.
روونیشیكرده‌وه، بەڕێوەبەرایەتی بەرەنگاربوونەوەی توندوتیژی دژی ئافرەتان و خێزانی هەولێریش له‌لای خۆیه‌وه هه‌ر له چوارچێوه‌ى ئه‌م هه‌ڵمه‌ته چالاكی جۆراوجۆرى هه‌بووه و هه‌ردوولاش به‌رده‌وام ده‌بن تاوه‌كو هه‌ڵمه‌ته‌كه له‌هه‌رێمی كوردستان كۆتایی پێدێت.
