لە رانیە پڕۆژەى بریتش کاونسڵ رەتدەکەنەوە

964+

وریا فەتاح

بەڕێوەبەرى زیاتر لە 100 قوتابخانەى سنوورى پەروەردەى رانیە کۆبوونەوە و واژۆیان کۆکردەوە بۆ رەتکردنەوەى پڕۆژەى بریتش کاونسڵ.

مامۆستا نەجمەدین عەلى، بەڕێوەبەرى قوتابخانەى قەندیلى بنەڕەتى لە حاجیاوا بە 964ـى وت،” دوانیوەڕۆى ئەمڕۆ سێشەممە، بە ئامادەبوونى بەڕێوەبەرى زیاتر لە 100 قوتابخانە و خوێندنگەى سنوورى بەڕێوەبەرێتى پەروەردەى رانیە، هەستاین بە کۆکردنەوەى واژۆ بۆ رەتکردنەوە و  کارپێنەکردن بە پڕۆژەی (پەرەپێدانی تواناکان- بریتش کاونسڵ)”.

وەک باسى دەکات، سەرەڕای نالەباری و سەختی گوزەرانی مامۆستایان و کۆی کۆمەڵگە لەم دۆخە نالەبارەى هەرێمی کوردستان، سەختتریش دۆخی پەروەردە و قوتابخانە و خوێندنگاکانە، کە لە نەبوونی هیچ خزمەتگوزارییەکی سەرەتاییدا رۆژگارەکانی تێدەپەڕێنێ، ناکرێ لەبری خەمخواردنیی جددی بە پڕۆژەیەکی وەرگیراو و ناپێویستەوە، مامۆستایان سەرقاڵی رۆتیناتى سەدبارەی بێئەنجام و کارپێنەکراو بکرێن.

جەختیش دەکاتەوە، هەر بۆیە تێکڕای ئامادەبوان واژۆیان بۆ پابەندنەبوون بە جێبەجێنەکردن و رەتکردنەوەی کۆی پڕۆژەکە کۆکردەوە.

داواش لە هاوپیشەکانیان لە سنوورى سەرجەم بەڕێوەبەرێتییەکانى دیکە پەروەردە دەکات، هەمان هەڵوێستی رەتکردنەوەی پڕۆژەکەیان هەبێت و راستەوخۆ کارپێنەکردنی لای خۆیانەوە بڕیار لێبدەن.

پڕۆژەى پریتش کاونسڵ یان پەرەپێدانى تواناکان، لە ساڵى 2019ـەوە لە قوتابخانە حکومییەکانى هەرێم دەستى بە جێبەجێکردن کردووە و ئەرکى مامۆستایان و بەڕێوەبەرەکان دیارى دەکات.

وەک ئەوەى نەجمەدین عەلى باسى دەکات، ساڵانێکە لەسەر کاغەز ئیش لەسەر پڕۆژەکە دەکرێت، هەلومەرجى گونجاو لە بار بۆ جێبەجێکردنى پڕۆژەکە نەخراوەتەڕوو.