ئەوقاف سکاڵاى کردووە
هەر دەرگاى تەوالێت و دارەمەیتى مزگەوت مابوو، ئەویشیان دزى
964+
دەشتى عارف – هەولێر
دزێک بە ماتۆڕێکى سێ تایە و بە رۆژى رووناک دەچێتە ناو مزگەوتى سەعید نەورەسى لە شارى هەولێر، پێنج دەرگاى تەوالێتى مزگەوتەکە و دارەمەیت (دارەبازە)یەک، دەدات بە کۆڵیدا و دەیاندزێت.
دزییەکە بەیانى رۆژى چوارشەممەى رابردوو ئەنجامدراوە، بەپێى ئەوەى کە پەیامنێرى 964 بەدواداچوونى بۆ کردووە، لە کامێراى چاودێرى مزگەوتەکەوە دەردەکەوێت، دزەکە زۆر بە لەسەرەخۆیى دەچێتە ناو مزگەوتەکە و دەستدەکات بە لێکردنەوەى دەرگاکان و دەیاندات بە کۆڵیدا و پێنج دەرگا دەدزێت.
دزەکە بەوە ناوەستێت، دەچێتە ژوورى مردووشۆر و دارەمەیتەکەش دەدزێت.
لەسەر ئەو بابەتە، نەبەز ئیسماعیل، بەرێوەبەری ئەوقافی هەولێر، بە 964ـی وت،” ئێمە لەرێگای بەرێوەبەرایەتی ئەوقافی هەولێرەوە لە بنکەی پۆلیسی ئیسکان داوای یاسایمان لەسەر ئەو دزە تۆمارکردوە و پۆلیس لێکۆڵینەوەکانی دەستپێکردووە بۆ دەستگیرکردنى”.
پێداچوونەوە: وریا فەتاح
