فڕۆکەخانەی نێودەوڵەتی هەولێر . وێنە: فڕۆکەخانەی هەولێر
بەهۆی هێرشەکانی ئیسرائیل
دوو فڕۆکەی گەشتیاری نەیانتوانیوە بگەنە هەولێر
964+
ژووری هەواڵ
بەهۆى داخستنى ئاسمانى عێراق لەکاتى هێرشەکانى ئیسرائیل بۆ سەر ئێران، ژمارەیەک گەشتی ئاسمانیى لە فڕۆکەخانەى هەولێر دواخران، دوو فڕۆکەى گەشتیاریش کە لە لەندەن و کۆڵنەوە بۆ هەولێر بەرێکەوتبوون، نەیانتوانى گەشتەکانیان تەواو بکەن و لە فڕۆکەخانەکانى تورکیا نیشتنەوە و بڕیارە ئەمڕۆ گەشتەکانیان تەواو بکەن و بگەنە فڕۆکەخانەى هەولێر.
ئەمڕۆ شەممە 26.10.2024، کۆمپانیاى فلاى ئەربیل رایگەیاند، گەشتێکى راستەوخۆیان لە لەندەنەوە بۆ هەولێر هەبووە و بڕیاربوو کاتژمێر 4:45 خولەکى بەرەبەیان بگاتە هەولێر، بەڵام بەهۆى داخستنى ئاسمانى عێراق فڕۆکەکە بە ناچاریى لە فڕۆکەخانەى ئەنقەرە نیشتووەتەوە و کاتژمێر 5:00ـی ئێوارە بە کاتى ئەنقەرە گەشتەکەى درێژە پێدەدات و دەگاتە هەولێر.
کۆمپانیاى فلاى ئەربیل ئاماژەى بەوەشکردووە، گەشتێکى دیکەیان لە نێوان شارى کۆڵنى ئەڵمانیا بۆ هەولێر هەبووە و بڕیاربوو کاتژمێر 6:00ـی بەرەبەیانى بگاتە هەولێر، بەڵام بەهۆى داخستنى ئاسمانى عێراقەوە نەیتوانیوە بگاتەوە هەولێر و لە فڕۆکەخانەى ئیستانبوڵ نیشتووەتەوە و چاوەڕوان دەکرێت، کاتژمێر 6:00ـی ئێوارە بە کاتى تورکیا گەشتەکەى بۆ هەولێر دەستپێبکاتەوە.
کۆمپانیاى فلاى ئەربیل راشیگەیاندووە، ژمارەیەک گەشتیان لە فڕۆکەخانەى هەولێرەوە دواکەوتووە و سبەى لەکاتى خۆیدا دەستپێدەکەنەوە و هیچ گەشتێک هەڵنەوەشاوەتەوە.
