قیرتاوكردنی یەكێك لە شەقامەكانی كەسنەران، فۆتۆ: پارێزگای هەولێر
هەولێر و دەوروبەری
هەڵبژاردن كۆتایی هات و قیرتاوكردن دەستیپێكردەوە
964+
ئەرسەلان عەبدوڵا
پارێزگاری هەولێر رایگەیاند، هەڵمەتی قیرتاوكردن لە هەولێر و دەوربەری درێژەی دەبێت و لە چەند گەڕەكێكی هەولێر و هەروەها لە ناحیەی كەسنەزان كارەكان دەستیانپێكردەوە.
ئەمڕۆ سێشەممە 22.10.2024 راگەیاندنی پارێزگای هەولێر بڵاویكردەوە، لە ناحیەی کەسنەزان و لەسەر بودجەی پارێزگا قیرتاوكردنی شەقامە ناوخۆییەكانی گەڕەكی حەسناوە و 11 ئادار دەستیپێكرد، ئەمەش بۆ ئەوەی رێگاوبان و شەقامەكان لەو كێشانەی هەیانە چارەسەر بكرێن.
هەروەها ئاماژەیان بەوەش كردووە، هەر ئەمڕۆ قیرتاوكردن لە چەند شەقامێك لە سنووری سەرۆكایەتیی شارەوانیی هەولێر دەستیپێكرد و كارەكان بەردەوامییان دەبێت.
لە ماوەی رابردوودا و بە تایبەتی لە پێش بەڕێوەچوونی هەڵبژاردنی كوردستان، هەڵمەتێكی فراوان لە سنووری پارێزگای هەولێر بۆ چاككردن و قیرتاوكردنی شەقام و رێگاوبانەكان دەستیپێكرد و ژمارەیەكی زۆر شەقام و رێگاوبان قیرتاوكران، بە تایبەتی لەو گەڕەكانەی بەم دواییە دروست بوون.
