"ئاسنفرۆشان چۆڵی کەن"
ئیدارەی خورماتوو دەروازەی شار دەکات بە باخچە و سەوزایی
964+
سیروان خورشید – خورماتوو
ئیدارەی قەزای خورماتوو بەنیازە شۆێنی ئاسنفرۆشانی نزیک دەروازەی شار بکات بە باخچە و سەوزایی.
زوڵفەقار حەیدەر قایمقامی خورماتوو بە 964ـی وت، “پێشتر چەند جارێک هۆشداری چۆڵکردنی ئەو شوێنانەمان بەئاسنفرۆشان داوە، بەڵام تائێستا چۆڵیان نەکردووە”.
“ئەمجارە مۆڵەتی یەک هەفتەمان بۆ داناون و لە دوای ئەو ماوەیە دەبێت سەرجەمیان ئەو شوێنانە چۆڵ بکەن، بەپێچەوانەوە رووبەڕووی رێکاری یاسایی دەبنەوە و سزای ماددیش دەدرێن”، زوڵفەقار حەیدەر وای وت.
ئاماژەی بەوەشکرد، پاش چۆڵبوونی، هەڵمەتی پاککردنەوەی شوێنەکە لەلایەن شارەوانی خورماتوو دەستپێدەکات و چەند باخچە و سەوزایی و نافورەی تێدا دروست دەکرێت، چونکە مەبەستیانە سیمای شەقام و دەروازەی قەزاکە بەجوانی دەرکەوێت.
ئەم هەڵمەتەی ئیدارەی خورماتوو دوای ئەوە دێت کە ماوەیەکە ژمارەی ئەو کەسانەی کاری ئاسنفرۆشی دەکەن، زیاتر بووە و بەشێوەیەکی نایاسایی شەقام و شوێنە گشتییەکانیان داگیر کردووە.
پێداچوونەوە: شۆڕش قادری