داخستنى پاڵاوگە نایاساییەکان گەیشت بە کوێ
تەمە پیسەکە واز لە ئاسمانى هەولێر ناهێنێت
964+
وریا فەتاح
هەرچەندە ئەمڕۆ 70 رۆژ بەسەر بڕیارى داخستنى 138 پاڵاوگە نایاساییەکەى هەولێردا تێدەپەڕێت، بەڵام تا ئێستا ئەنجامى کۆتایى داخستن یان دانەخستنیان نەخراوەتەڕوو و ئاسمانى هەولێریش هەر بە پیسى ماوەتەوە.
بەپێى گرتەیەکى ڤیدیۆیى 964، ئەمڕۆ تەم و پیسى ئاسمانى هەولێر لەشێوەى هەورێکى رەش هێڵێکى بەسەر بەشى باکورى رۆژئاواى هەولێردا کێشاوە.
964 لە واتساپەوە گرتەکەى بۆ ئومێد خۆشناو پارێزگارى هەولێر ناردووە و پرسیارى ئەنجامى کۆتایى داخستنى پاڵاوگەکانى لێکردووە و چاوەڕێى وەڵامە.
لاى خۆیەوە، دڵشاد حسێن هیرانى، بهڕێوهبهرى فهرمانگهى ژینگهى ههولێر لەسەر چڕبوونەوەى تەمەکە بە 964ـى وت، “هۆکارەکە تەنیا هەولێر نییە، سێ جۆر با هۆکارى سەرەکییە، لە کەرکوک و خەبات و مەخمورەوە تۆزوخۆڵ و پیسایى دەهێنن بۆ ناو هەولێر و لە هەولێر چڕ دەبنەوە”.
