لە سێدارەدان زیادی کردووە لە ئێران _ وێنە: ئاژانسەکان
"بەبێ هۆشی گیراوە"
رێکخراوی هانا: ئێران ئەندامێکی پەکەکە لە سێدارە دەدات
964+
ئەحمەد مستەفا
رێکخراوی مافی مرۆڤی هانا دەڵێت، حاتەم ئوزمیر کە خەڵکی کوردستانی تورکیایە و لە ئەندامانی پارتی کرێکارانی کوردستان (پەکەکە)یە لە ئێران بە تۆمەتی موحاربە سزای (سێدارە)ی بە سەردا سەپێندراوە.
بە قسەی هادی رەسوڵزاد، وتەبێژی مافی مرۆڤی هانا بێت بۆ 964، ئەو سزایە لە رۆژانی رابردوو و لەلایەن دادوەر نەجەف زادە، لە لقی سێهەمی دادگای شۆڕشی ورمێ دەرکراوە.
حاتەم ئوزدمیر لە هاوینی ئەمساڵ، لە شەڕی نێوان گەریلاکانی پارتی کرێکارانی کوردستان (پەکەکە) و سوپای پاسداران لە ناوچەی چاڵدێران بریندار بوو و پاشان بە بێهۆشی بەدیل گیرا.
رێکخراوەکانی مافی مرۆڤی سەر بە نەتەوە یەکگرتووەکان هۆشداری لە بەرزبوونەوەی ئاماری لەسێدارەدان لە رۆژهەڵاتی کوردستان و ئێران دەدەن کە دوای هاتنە سەرکاری مەسعود پزیشکیان وەک سەرۆک کۆمار، بۆ دوو هێندە بەرزبووەتەوە.
نوسینگەی کۆمیسیاری باڵای مافی مرۆڤ لە رێکخراوی نەتەوە یەکگرتووەکان لە راگەیەنراوێکدا دەڵێت، “لە کاتێکدا ئاماری لەسێدارەدان لە ئێران لە مانگی تەمموزی ئەمساڵ 45 حاڵەت بووە، لە مانگی ئابدا بۆ زیاتر لە دوو هێندە بەرزبووەتەوە و گەیشتووەتە لانیکەم 93 کەس”.
ئاماژە بەوەشکراوە، تەنیا لە ماوەی ئەمساڵدا زیاتر لە 400 کەس لە ئێران بە تۆمەتی جۆراوجۆر لەسێدارە دراون کە لانیکەم 15 کەسیان ژن بوون.
هاوکات رێکخراوی مافی مرۆڤی هەنگاو دەڵێت، “لەو ژمارەیەی کە مانگی رابردوو لە زیندانەکانی ئێران لەسێدارە دروان، لانیکەم 20 کەسیان کورد بوون”.
ئەوەش لەکاتێکدایە مانگی رابردوو مەسعود پزیشکیان وەک سەرۆک کۆماری ئێران و کەسێکی ریفۆڕمخواز دەستبەکار بوو و گەورەترین بەڵێنیشی لەکاتی بانگەشەی هەڵبژاردنەکاندا، رووبەڕووبوونەوەی توندوتیژی و پشتیوانی لە داخوزاییەکانی خەڵک بوو.
وێنەی حاتەم ئوزدمیر
