هۆڕنلێدان
دەستەى ژینگە بۆ کۆمیسیۆن:
“بەلایەنەکان بڵێ لە کاتى بانگەشە واز لە هۆڕنلێدان بهێنن”
964+
وریا فەتاح
دەستەى پاراستن و چاککردنى ژینگە زیاتر لە دەرزەنێک خاڵى ژینگەى بۆ کۆمیسیۆن دەنێرێت و داوا دەکات لە کاتى بانگەشەدا لایەنى ژینگەیى لەبەرچاو بگیرێت.
لەیەکێک لە خاڵەکاندا هاتووە، پێویستە کۆمیسیۆن ناوى ئەو لیست و قەوارانە ئاشکرا بکات کە لە بانگەشەدا ژینگە پیس دەکەن و پابەندى یاسا ژینگەییەکان و رێنماییەکانى شارەوانى نابن.
دەستەى ژینگە بە 13 خاڵ دەیەوێت بانگەشەى هەڵبژاردن پاک و تەندروست بێت کە ئەمانەن:
یەکەم: لافیتە و نوسینەکانیان لەسەر قوماشبن نەک لەسەر فلێکس و نایلۆن، کە دواجار بە ئاسانى شى نابنەوە و زیان بە زۆرێک لە گیانەوەران و رووەک و خاک دەگەیەنن.
دووەم: پۆستەرەکان بە تیپ جێگیر بکرێن نەک بە سیکۆتین، هەروەها بزمار بەکارنەهێنن بۆ جێگیرکردنى لافیتە لەسەر درەختەکان و درەختەکان بە لافیتە دانەپۆشرێن.
سێ: جوانبینى و پاراستنى هەستى بینین رەچاو بکەن لە هەڵبژاردنى شوێنى هەڵواسینى لافیتەکان، چونکە بە هەڕەمەکى هەڵواسین دەبێتە هۆى جەنجاڵى و شێواندنى هەستى بینین.
چوار: زیادەڕۆیى نەکەن لە بەهەدەردانى کاغەز و کارتۆن.
پێنج: مادەى پلاستیکى و نایلۆنى نەدرێتە دەنگدەر وەک بانگەشە، لە حاڵەتى کۆبوونەوەى جەماوەریشدا پێویستە هەڵسوڕاوانى لیست و کاندید پاشماوەکان کۆبکەنەوە.
شەش: بەکارنەهێنانى پارکە گشتییەکان و باخچەى نێو گەڕەکەکان بۆ بانگەشە.
حەوت: سودوەرگرتن لە بەکارهێنانى شاشەى گەورەى ئەلیکترۆنى و تەلەفزیۆنى لە شوێنە گونجاوەکاندا.
هەشت: بەردەوام کۆمیسیۆن حزبە سیاسییەکان ئاگادار بکاتەوە لەو سزا داراییانەى کە رووبەڕوویان دەبێتەوە لە حاڵەتى سەرپێچیکردنى یاساکانى ژینگە و شارەوانى.
نۆ: هاندانى لیستەکان بۆ زیاتر بەکارهێنانى سایتە ئەلیکترۆنییەکان و تۆڕە کۆمەڵایەتییەکان بۆ بانگەشەى هەڵبژاردن.
دە: کۆمیسیۆن ناوى ئەو لایەن و قەوارە سیاسیانە ئاشکرا بکات کە پابەندى یاسا و رێنماییە ژینگەییەکان نابن.
یانزە: بەکارنەهێنانى بڵندگۆ و هۆڕن لێدان لە کاتى گردبوونەوەى جەماوەرى و خۆدورگرتن لە بەکارهێنانى قافڵەى ئۆتۆمبێل وەک شێوازێکى بانگەشە، چونکە زیان بە هەستى بیستن دەگەیەنێت.
دوانزە: کۆمیسیۆن هەماهەنگ و هاوکار بێت لەگەڵ رێکخراوە ژینگەییەکاندا بۆ ئەوەى بەدواداچوون بۆ پێشێلکارییە ژینگەییەکان بکەن.
سیانزە: کۆمیسیۆن بە هاوکارى لەگەڵ میدیاکان هەوڵ بدات بۆ تێکەڵکێشکردنى بابەتەکانى ژینگەپارێزى لەگەڵ هەڵمەتى هەڵبژاردن.