خولی هەشتەمی شانۆی نێودەوڵەتیی شەقام لە كەركوك گۆڕانكاری بەسەردا دێت

964+
ئەرسەلان عەبدوڵا

بڕیارە لە سەرەتای مانگی تشرینی دووەمی داهاتوو خولی هەشتەمی فێستیڤاڵی نێودەوڵەتیی شەقام لە كەركوك بەڕێوەبچێت، سەرۆكی فێستیڤاڵەكەش دەڵێت، ئەمجارە نمایشەكان لە چەند شوێنێكی جیاواز لەسەر داوای دەرهێنەرەكان پێشكەش دەكرێن.

نەژاد نەجم سەرۆكی فێستیڤاڵی شەقام لە كەركوك، ئەمڕۆ چوارشەممە 11.9.2024 بە 964ی راگەیاند، ئامادەكاری دەكەن بۆ سازدانی خولی هەشتەمی فێستیڤاڵی شانۆی شەقام لە كەركوك، كە بەرهەمی وەزارەتی رۆشبیریی كوردستانە، بڕیاریشە لە 2.11.2024 فێستیڤاڵەكە دەستپێبكات و سێ رۆژ بەردەوام دەبێت.

وتیشی، تا ئێستا 80 نمایش لە رێگەی ئەلیكترۆنییەوە پێشكەش بە لیژنەی فێستیڤاڵ كراون، كە لیژنەكە لە سێ كەس پێكهاتوون، لەو بەرهەمانە 20 تا 24 بەرهەم هەڵدەبژێرن.

تا ئێستا 80 نمایش لە رێگەی ئەلیكترۆنییەوە پێشكەش بە لیژنەی فێستیڤاڵ كراون

” بەرهەمەكان لە ناوخۆی كوردستان و عێراق، ئێران، توركیا، ئەفریقا، ئەوروپا و  وڵاتانی عەرەبییەوە پێشكەش كراون”، نەژاد نەجم وای وت.

سەبارەت بە شوێنی نمایشەكان، سەرۆكی فێستیڤاڵ ئەوەی ئاشكرا كرد، ئەمساڵ شوێنی نمایشەكان جیاواز دەبن و لە چەند شوێنێكی ناو شاری كەركوك دەبێت، جگە لەوە دەرهێنەری هەر نمایشێك كوێی دەستنیشان كرد، لەوێدا نمایش پێشكەش دەكرێت.

نەژاد نەجم ئەوەشی باس كرد، جگە لە نمایشە شانۆییەكان، پانێل، بڵاوكردنەوەی كتێب، پێشكەشكردنی سیمینار و توێژەینەوەش لە چوارچێوەی فێستیڤاڵەكە ئەنجام دەدرێن.

بڕیارە لە 5.10.2024 كۆنگرەیەكی رۆژنامەوانی سەبارەت بە فێستیڤاڵەكە هەر لە كەركوك بەڕێوەبچێت.

بە دەهۆڵ و زوڕنا فێستیڤاڵی شانۆی شەقامی کەرکوک دەستیپێکرد