نرخی نەوت بەرزبووەوە

+964

توانا نەقی

نرخی نەوت لەچاو دوێنێ و چەند رۆژی رابردوو هەرچەندە هەر لەخوار 80 دۆلارەوەیە، بەڵام بەرزبووەتەوە و 78 دۆلاری تێپەڕاندووە.

لە کۆتاییەکانى هەفتەى رابردوودا دۆخى رۆژهەڵاتى ناوەڕاست و هەڕەشەى ئێران بۆسەر ئیسرائیل، نرخى نەوتى بەشێوەیەکى خێرا دابەزاند، بەڵام ئێستا نرخەکەى بەرەو بەرزبوونەوە هەنگاویناوە.

بەپێى داتاکانى بازاڕى جیهانى بۆ ئەمڕۆ پێنجشەممە، هەر بەرمیلێک نرخی نەوتی برێنت بە 78 دۆلار و 35 سەنت مامەڵەى پێوە دەکرێت، بەوەش نرخەکەی 0.02% بەرز بووەتەوە.

هاوکات نرخی نەوتی سووکی تێکساسی ئەمریکا 75 دۆلار و 36 سەنتە بە رێژەى 0.13% بەرز بووەتەوە.

کوژرانى ئیسماعیل هەنییە، سەرۆکى مەکتەبى سیاسى بزوتنەوەى حەماسى فەلەستینى لە تاران و هەڕەشەى تۆڵەکردنەوە لە ئیسرائی لەلایەن ئێرانەوە، نرخى نەوتى بەشێوەیەکى خێرا دابەزاند و هێنایە 75 دۆلار لە کاتێکدا هەفتەى پێشووتر لە نزیک 85 دۆلارەوە مامەڵەى پێوە دەکرا.

هۆکارێکى دیکەى دابەزینى نرخى نەوت لە رۆژانی رابردوودا ، بەرزى قەبارەى نەوتى کۆگاکراوى ئەمەریکییە.